اسلام آباد۔16نومبر(اے پی پی)سرائیکی تے سندھی دا تاریخی تہذیبی صدیاں توں گھاٹا سانگا اے۔ اے گالھ دانشور جامی چانڈیو “جینویں ترٹیا ہڈ ݙکھے” دی ڳھنݙ کھلائی ویلھے کراچی آرٹس کونسل اچ آکھی ۔ عمر کوٹ دے شاعر خلیل کنٻھار دی شاعری دا ترجمہ سرائیکی دے مہان دانشور سئیں رفعت عباس کیتے جیندی ڳھنݙ کھلائی دی تقریب کراچی آرٹس کونسل اچ تھئی۔ ایں موقعے تے سئیں رفعت عباس دا آکھݨ ہا جو خلیل کنٻھار ڄاݨدے جو کارونجھر دا گلابی گرینائٹ اچھوتیں دی آرٹ گیلری تے ناٹک گھر ھے۔ اونکوں خبر ھے جو ایہا راہ ھے جتھوں راکھشس بارش وچ دھاندے ہوئے روز دے کمیں کاریں پچھوں واپس ولسن تے آپٹے گیت تے ناچ وچوں “رگ وید” دے مندے دا ولدا ڈیسن۔”
ساری سندھی سرائیکی سنگت آرٹس کونسل وچ خلیل کنٻھار تے رفعت عباس کوں ڈیکھݨ، سݨݨ سانگے لوک سرائیکی وسیب توں سندھ اچ کٹھے تھئین جینویں لالا اقبال بلوچ تشریف گھن آئین ۔سینئر تے معروف صحافی نزیر لغاری مجموعے اچوں چوݨوی شاعری سنݨائی۔ ڈاکٹر ممتاز کلیانی تے سندھی سرائیکی دے کئی وڈے دانشور موجود ہن۔
