لاہور۔17نومبر (اے پی پی) گورنر پنجاب محمد بلیغ الرحمان دی صدارت خمیس کوں گورنر ہائوس لاہور اچ چھل متاثرین دی بحالی بارے مختلف جامعات دے وائس چانسلرز دا اجلاس تھیا۔ اجلاس اچ پرنسپل سیکریٹری ٹو گورنر پنجاب نبیل اعوان،اخوت فائونڈیشن دے سربراہ ڈاکٹر امجد ثاقب اتے چیف آرگنائزر ایدھی فائونڈیشن پاکستان ڈاکٹر سعید الہی وی موجود ہن۔ ایں موقع تے ڳالھ مہاڑ کریندیں ہوئیں گورنر پنجاب محمد بلیغ الرحمان آکھیا جو پبلک سیکٹر اتے پرائیوٹ سیکٹر جامعات چھل متاثرین کیتے امدادی سامان ٻھیجݨ اتے فلڈ ریلیف کٹھا کرݨ نال جینویں فیکلٹی اتے طلبا چھل متاثرہ علاقیاں اچ ونڄ تے بحالی دے کماں اچ حصہ ڳھدا قابل تحیسن اے۔ انہاں آکھیا جو جامعات دے وائس چانسلرز، فیکلٹی ممبرز اتے طلبا ایں جذبے نال چھل متاثرین دی بحالی اچ آپݨا حصہ پیندے رہین۔ اجلاس اچ ایں ڳالھ تے اتفاق کیتا ڳیا جو جلدی ہک ایجھا پائلٹ پراجیکٹ پروگرام شروع کیتا ویسی جئیں اچ طلباء اتے خصوصی طور سائیکالوجی،سوشیالوجی اتے سوشل ورک دے طلبا چھل متاثرین دے نفسیاتی اتے جذباتی مسئلیاں کوں حل کرݨ کیتے سروے کریسن اتے چھل متاثرین کوں ٹراما توں نکلݨ اچ کردار ادا کریسن۔ اجلاس اچ کنگ ایڈورڈ میڈیکل یونیورسٹی دے وائس چانسلر ڈاکٹر محمود ایاز، یونیورسٹی آف ایجوکیشن دے وائس چانسلر طلعت نصیر پاشا، لاہور کالج فار ویمن یونیورسٹی دی وائس چانسلر ڈاکٹر بشری مرزا، یونیورسٹی آف انجینئرنگ اینڈ ٹیکنالوجی دے وائس چانسلر سید منصور سرور،یونیورسٹی آف ویٹرنری اینڈ اینیمل سائنسز دے وائس چانسلر نسیم احمد،آئی ٹی یونیورسٹی دے وائس چانسلر سرفراز خورشید اتے ٻے شریک تھیے۔
