اسلام آباد۔17نومبر (اے پی پی) امریکی آرمی سینٹرل کے کمانڈنگ جنرل لیفٹیننٹ جنرل پیٹرک ڈی فرینک دی قیادت اچ امریکی وفد نیشنل ڈیزاسٹر مینجمنٹ اتھارٹی (این ڈی ایم اے) دا دورہ کیتا اتے چیئرمین این ڈی ایم اے لیفٹیننٹ جنرل انعام حیدر ملک نال ملاقات کیتی۔ وفد پاکستان اچ چھل دے بعد تھیوݨ آلے ضیان اتے بحالی دے کماں تے ڳالھ کیتی اتے مستقبل بارے آپسی تعاون اتے اقدامات بارے لائحہ عمل ٻݨاوݨ تے غور کیتا۔ چیئرمین این ڈی ایم اے ، نیشنل انسٹی ٹیوٹ آف ڈیزاسٹر مینجمنٹ جیھے معلوماتی اتے تحقیقی اداریاں دی تشکیل دے علاوہ عالمی اتے علاقائی پلیٹ فارمز تے این ڈی ایم اے دی بھر پور نمائندگی تے زور ݙتا۔ کمانڈنگ جنرل، لیفٹیننٹ جنرل پیٹرک ڈی فرینک چھل وچال پاکستان دی ریسکیو اتے ریلیف دی کوششاں دی تعریف کیتی اتے یو ایس ایڈ ولوں امداد جاری رکھݨ کیتے امریکی حکومت دی مدد دا یقین ݙوایا۔ چیئرمین این ڈی ایم اے اوکھے ویلھے پاکستان دا دورہ کرݨ تے امریکی فوج دے وفد دا شکریہ ادا کیتا۔
