ملتان۔28نومبر (اے پی پی) جنوبی پنجاب دے چھل متاثرین دی آبادکاری دا مرحلہ شروع کر ݙتا ڳے۔ حکومت پنجاب چھل متاثرین کوں ادائیگی شروع کر ݙتی اے، پنڄاہ کروڑ روپے متاثرین اچ تقسیم کر ݙتے ڳن۔ متاثرین کوں ادائیگی بنک آف پنجاب توں کیش دی صورت کیتی ویندی پی اے۔ چھل متاثرین دی بحالی دے عمل کوں تکھا کرݨ کیتے ایڈیشنل چیف سیکرٹری ساوتھ پنجاب دے ملتان آفس اجلاس تھیا جئیں دی صدارت کمشنر ڈی جی خان لیاقت علی چٹھہ کیتی۔ پاکستان اچ اقوام متحدہ دے نمائندے لینی سوہارلم ،اقوام متحدہ دی پنجاب دی نمائندہ شمائلہ روحی،پی ڈی ایم اے دے افسران شہباز بخاری اتے ٻے حکام اجلاس اچ شرکت کیتی۔ کمشنر ڈی جی خان لیاقت علی چٹھہ چھل توں متاثرہ سارے لوکاں دی بحالی دے عزم دا اظہار کریندیں ہوئیں آکھیا جو ڈی جی خان اتے راجنپور دے چھل متاثرین کوں مالی امداد ݙیوم شروع کر ݙتی اے اتے گھراں دے ضیان تے پنجاہ ہزار توں چار لکھ روپے تئیں ݙتے ویندے پن۔
