ملتان۔28نومبر(اے پی پی):سیکرٹری محکمہ پرائمری و سیکنڈری ہیلتھ کئیر جنوبی پنجاب محمد اقبال آکھیے جو ملک دے ٻئے علاقیں وانڳوں جنوبی پنجاب دے چار ضلعیں دے مختص کیتے ڳئے علاقیں اچ انسداد پولیو خصوصی مہم دا آغازکرݙتا ڳئے ۔ انسداد پولیو خصوصی مہم دے دوران ضلع ملتان دی 61 یونین کونسلاں، ڈیرہ غازی خان دی 18 یونین کونسلاں،راجن پور ضلع دی ݙو تحصیلاں راجن پوروجام پور جݙاں جو بہاولپورضلع کوں مکمل طور تے کور کیتا ویسی تے ایں خصوصی پولیو مہم دے دوران جنوبی پنجاب اچ 18 لکھ 58 ہزارتوں ودھ پانچ سال توں گھٹ عمر دے ٻالاں کوں پولیو توں بچݨ دے قطرے پلائے ویسن ۔ اے ڳالھ انہاں ہیلتھ سیکرٹریٹ جنوبی پنجاب اچ ٻالاں کوں پولیو توں بچݨ دے قطرے پلا تے مہم دا افتتاح کیتا۔ ایں موقع تے ڈپٹی سیکرٹری ٹیکنیکل ڈاکٹرماریہ ممتاز، ڈسٹرکٹ ہیلتھ آفیسر ملتان ڈاکٹرفاروق احمد اتے ٻئے افسران وی انہاں دے رلے ہن ۔ایں موقع تے سیکرٹری محمداقبال ٻالاں کوں پولیو توں بچاوݨ دی ویکسین دے قطرے پلائے اتے انہاں دیاں انگلیاں تے نشان وی لاتے ۔ انہاں ڳالھ مہاڑ کریندے ہوئیں آکھیے جو انسدادِ پولیو مہم اچ 100فی صدٹارگٹ دا حصول ہر صورت یقینی بݨایا ویسی ۔ انہاں مزید آکھیا جو پولیو مہم دی موثر مانیٹرنگ کیتے ہیلتھ سیکرٹریٹ افسران کوں مانیٹرنگ ذمہ واریاں تفویض کرݙتیاں ڳئن ، انہاں سارے مانیٹرنگ افسران کوں ہدایات جاری کریندے ہوئیں آکھیے جو انسدادِ پولیو خصوصی مہم دے دوران مائیکرو پلان تے پوری طرح عملدرآمد کیتا ویسی ۔
