اسلام آباد۔28نومبر(اے پی پی):سپیکر قومی اسمبلی راجہ پرویز اشرف آکھیے جو اسلام آباد اچ کینیڈین ویزا سینٹر دا ول کھلݨ کامیاب پارلیمانی کوششاں دا مظہر اے جیں کیتے کینیڈین حکومت دے شکر گزار ہیسے ۔ ترجمان قومی اسمبلی آکھیے جو پاکستان دی قومی اسمبلی دے سپیکر راجہ پرویز اشرف اگست 2022 اچ ہیلی فیکس اچ تھیوݨ آلی دولت مشترکہ دی پارلیمانی کانفرنس اچ شرکت کیتے کینیڈا دا سرکاری دورہ کیتا۔ کانفرنس دے موقع تے سپیکر پرویز اشرف ہائوس آف کامنز اتے سینیٹ آف کینیڈا دے سپیکرز دے نال ݙو پاسے ملاقاتاں کیتیاں تاں جو ݙو پاسے تعاون کوں اڳوں ودھاوݨ دے ممکنہ طریقیں تے ڳالھ مہاڑ کیتی ونڄ سڳے ۔ملاقاتاں اچ پاکستان دے سپیکر اپݨے کینیڈین ہم منصب تے زور ݙتا جو او پاکستان اچ آپݨے ویزا ایپلیکیشن سینٹرز (VACs) کوں ابوظہبی توں منتقل کرن کیوں جو ایں توں نہ صرف کینیڈا اچ رہݨ آلے پاکستانیاں تے کینیڈا ونڄݨ آلے پاکستانی شہریاں کوں سہولت ملسی بلکہ ویزا پروسیسنگ دا ویلھا وی تھوڑا تھی ویسی ۔ کینیڈین پارلیمنٹ دے پریذائیڈنگ افسران سپیکر پاکستان کوں یقین ݙیوایا ہئی جو او ایں معاملے کوں آپݨی حکومت نال چیسن تے معاملے کوں ممکن بݨاوݨ اچ چنڳاں کردار نبھیسن ۔ ترجمان آکھیے پاکستان دے سپیکر تے پارلیمانی وفد دی کامیاب سفارت کاری دے نتیجے اچ کینیڈین حکومت آپݨا ویزا ایپلیکشن سینٹر پاکستان منتقل کرݨ دا فیصلہ کیتے ۔ سپیکر قومی اسمبلی راجہ پرویز اشرف ایں معاملے تے وختی کاروائی کرݨ تے کینیڈین ہم منصب کوں شکریہ دے خط وی بھیڄن ۔
