اسلام آباد۔28نومبر(اے پی پی):صدر مملکت ڈاکٹر عارف علوی آکھیے جوخصوصی لوکاں دے حقوق اجاگر کرݨ ، انہاں بارے معاشرتی طرز عمل اچ تبدیلی گھن آوݨ ، مرکزی دھارے اچ انہاں دی شمولیت دے رستے اچ آندے نفسیاتی اتے جسمانی رکاوٹاں کوں ہٹاوݨ تے معاشی تے مالی طور تے بااختیار بݨاوݨ کیتے جامع تے موثر آگاہی مہم دی لوڑھ اے ۔صدر مملکت اے ڳالھ ایوان صدر دے پریس سیکرٹری قمر بشیر دی طرفوں خصوصی لوکاں متعلق آگاہی مہم دے منصوبیں تے ݙتی ڳئی پریزنٹیشن دے دوران آکھی ۔ ایں موقع تے خاتون اول بیگم ثمینہ عارف علوی اتے صدر سیکرٹریٹ دے اعلیٰ حکام وی موجود ہن ۔ اجلاس توں خطاب کریندے ہوئیں صدر آکھیے جو خصوصی لوک ساݙی آبادی دا ھک اہم حصہ ہن اتے متعلقہ سٹیک ہولڈرز اتے عام طور تے معاشرے دا فرض اے جو او زندگی دے سارے پہلوواں بشمول سیاست، اقتصادیات، مالیات، کاروبار، تجارت اتے خدمات اچ انہاں دی شمولیت کوں یقینی بݨاوے۔ انہاں خصوصی لوکاں دی مکمل صلاحیت دا ادراک کرݨ کیتے نفسیاتی تے جسمانی رکاوٹاں کوں دور کرݨ تے انہاں کیتے ایجھے حالات پیدا کرݨ تے زور ݙتا جو او معاشرے دے مفید رکن بݨݨ اچ مدد کرن۔ صدر آکھیے جو خصوصی لوکاں بارے اپݨے رویں تے نظر ثانی کرݨ تے آپݨے تعلیمی نظام اچ تلویں سطح توں فعال اصلاحات گھن آوݨ دی لوڑھ اے تاں جو ساݙے طلباء کوں خصوصی لوکاں دے حقوق تے معاشرے دیاں ذمہ واریاں بارے ہر سطح تے آگاہی ݙتی ونڄ سڳے تے انہاں کوں دقیانوسی تصورات توں بچایا ونڄ سڳے ۔ صدر مملکت آکھیے میڈیا لوکاں کوں آگاہی ݙیوݨ ، تعلیم اتے تفریح ݙیوݨ کیتے ہمیشہ ساریں توں اڳوں رہیے تے شہری، دیہاتی تے غیر مراعات یافتہ علاقیں اچ ایندی وسیع رسائی اے۔
