اسلام آباد۔28نومبر(اے پی پی) وزیرِ اعظم محمد شہباز شریف لانگ مارچ دے دوران سکیورٹی اتے ٹریفک دے بہترین انتظامات تے شہریاں دی اوکھ گھٹاوݨ کیتے قانون نافذ کرݨ آلے اداریں کوں خراج تحسین پیش کیتے۔ سنوار کوں وزیراعظم محمد شہباز شریف دی صدارت اچ امن و عامہ دی صورتحال دے حوالے نال اعلیٰ سطح دا اجلاس تھیا ۔ اجلاس اچ وزیرِ داخلہ رانا ثناء اللہ، سیکرٹری داخلہ سودھے قانون نافذ کرݨ آلے اداریں دے سربراہان اتے اسلام آباد انتظامیہ دے اعلیٰ افسران شرکت کیتی۔ اجلاس اچ وزیرِ اعظم لانگ مارچ دے دوران سیکیورٹی دے بہترین انتظامات تے قانون نافذ کرݨ آلے اداریں دا شکریہ ادا کیتا۔ وزیرِاعظم لانگ مارچ دے دوران ٹریفک دے انتظامات اتے انہاں اقدامات کنوں شہریاں کوں ودھ اوکھ نئی تھئی ایندی تعریف کیتی ۔ وزیرِاعظم قانون نافذ کرݨ آلے اداریں دے افسران اتے سپاہیاں کوں آپݨی ذمہ واریاں چنڳے طریقے سرانجام ݙیوݨ تے خراجِ تحسین پیش کیتا۔
