اسلام آباد۔30نومبر(اے پی پی سرائیکی نیوز سروس) حضرت شاہ رکن عالم دے 708 ویں عرس دے موقع تے مرکزی امام حسین کونسل دے چیئرمین ڈاکٹر غضنفر مہدی قومی صوفی کانفرنس دا اہتمام کیتا جیندے وچ مختلف دانشوراں شرکت کیتی۔ انہاں دا آکھݨ ہئی حضرت شاہ رکن عالم دی والدہ بی بی راستی نیک مئی ہئی جیڑھی روزانہ قرآن پاک دا ختم کریندی ہئی۔ آپ انہاں دی جھولی اچ تربیت پاتی تے نال ہی آپݨے والد تے ݙاݙا سئیں توں روحانی تربیت ڳھدی۔حضرت شاہ رکن عالم کوں نکے لا توں ہی اسلام دی اشاعت تے علم کوں ودھاوݨ دا شوق ہئی۔ انہاں جنوبی ایشیا دے کئی ملکاں اچ قرآن پاک دی تعلیم اچ تفسیر، فقہ تے حدیث دیاں درس ڳاہیں ٻݨوائیاں۔ حضرت شاہ رکن عالم دا وصال 7 جمادی الاول کوں تھیا ۔
مختلف مقررین دا آکھݨ ہا جو 708 سال گزرݨ دے بعد وی اڄ وی شاہ رکن عالم دی تعلیمات بھرپی ، امن، اتحاد ، مساوات دا سبق ݙیندن تے اڄ وی اوہو سنھیا ساݙی نسل واسطے کارآمد اے جیڑھا 708 سال پہلے ݙتا ڳیا ہئی۔ شاہ رکن عالم قومی صوفی کانفرنس نال ڈاکٹر غضنفر مہدی، ایران دے ثقافتی کونسلر احسان خذائی، احسان کبریا، ڈاکٹر سعدیہ کمال، کوکب اقبال ، اخلاق زیدی، نعیم اکرم قریشی ،زیب النسا، منظور سیال خطاب کیتا ۔
