اسلام آباد۔6دسمبر(اے پی پی)پاکستان بھارتی حکومت کولو تاریخی بابری مسجد کوں اوندی اصل ڄاہ تے ولا ٻݨاوݨ اتے ایندی تباہی دے ذمہ دار مجرماں کوں سزا ݙیواݨ دا مطالبہ کیتے۔ دفتر خارجہ دی ترجمان ہندو انتہا پسنداں دے ہتھو تاریخی بابری مسجد دی شہادت دے 30 سال تھیوݨ تے ہک بیان اچ بابری مسجد دی ڄاہ تے ہندو مندر ٻݨاوݨ دی مذمت کیتی اتے بھارت اچ ودھدے اسلامو فوبیا اتے نفرت انگیز جرائم دا نوٹس ڳھنݨ تے زور ݙتے۔ انہاں آکھیے جو پاکستان بین الاقوامی برادری، اقوام متحدہ اتے متعلقہ بین الاقوامی اداریاں کوں آہدے جو او انتہا پسند ”ہندوتوا“ حکومت توں بھارت اچ اسلامی ورثے آلیاں ڄاہیں کوں بچاوݨ دے اقدامات کرن، اڄ بھارتی شہر ایودھیا اچ ہندو انتہا پسنداں دے ہتھو تاریخی بابری مسجد مسمار کرݨ دا 30 واں ورھیݨا اے اتے اے واقعہ بھارت اچ ودھدے مسلم مخالف جنون دی افسوسناک یاد ݙویندے۔ ترجمان موجب اساں بابری مسجد دی تباہی دے ذمہ دار مجرماں دی بریت دی مذمت کریندے ہیں، بھارت اچ ہندو بالادست گروہ وارانسی دی گیانواپی مسجد سودھا کجھ ٻیاں مسیتاں کوں مندر ٻݨاوݨ دا مطالبہ کریندے پن، چنتا اے جو ایندے نال بابری مسجد ڄھیں ٻئے افسوسناک واقعات تھی سڳدن اتے ایکوں روکݨ ضروری اے۔
