اسلام آباد۔9دسمبر(اے پی پی) اسلامی تعاون تنظیم (او آئی سی) دے سیکرٹری جنرل حسین براہیم طحہٰ وزیرخارجہ بلاول بھٹو زرداری دی دعوت تے 10 توں 12 دسمبر تئیں پاکستان تے آزاد جموں و کشمیر دا دورہ کریسوں ۔ دفتر خارجہ دے ترجمان دی طرفوں جاری بیان موجب او آئی سی دے سیکرٹری جنرل دورے دے دوران 5 رکنی وفد دی قیادت کریسن ، نومبر 2021 اچ عہدہ سنبھالݨ دے بعد اے انہاں دا پاکستان دا پہلا باقاعدہ دورہ ہوسی ۔ اپݨے دورے دے دوران اسلامی تعاون تنظیم دے سیکرٹری جنرل وزیراعظم پاکستان نال ملاقات کریسن تے وزیر خارجہ نال وفد دی سطح تے ملاقاتاں کریسوں ، او وفاقی وزیر امور کشمیر و گلگت بلتستان ، وفاقی وزیر انفارمیشن ٹیکنالوجی اتے وزیر تجارت نال وی ملاقات کریسن ۔ او آئی سی دے سیکرٹری جنرل آزاد جموں و کشمیر دا وی دورہ کریسن ۔ ݙو طرفہ ڳالھ مہاڑ دے دوران او آئی سی دے سیکرٹری جنرل اتے وزیر خارجہ او آئی سی دے ایجنڈے تے موجود جھیڑا جموں و کشمیر، اسلامو فوبیا تے افغانستان اچ انسانی صورتحال سودھے ٻئے امور تے وی ڳالھ مہاڑ کریسن۔ بیان موجب انہاں دے دورے نال او آئی سی دے رکن ملکاں دے درمیان اقتصادی، سماجی اتے تکنیکی تعاون دے اہم امور تے ڳالھ مہاڑ دا موقع وی ملسی ۔ پاکستان او آئی سی دے بانی رکن دی حیثیت نال تنظیم اچ اسلامی یکجہتی، اتحاد اتے مکالمے دے ودھارے کیتے کوششاں جاری رکھیسی ۔ اسلامی تعاون تنظیم دے وزراءخارجہ کونسل دے سربراہ دی حیثیت نال پاکستان او آئی سی دے رکن ملکاں دے درمیان تجارت، کامرس، فوڈ سکیورٹی، سائنس اتے ٹیکنالوجی دے شعبے اچ تعاون دے علاوہ جھیڑیں کوں حل کرݨ کیتے او آئی سی دے امن اتے سلامتی دے ڈھانچے کوں مکمل طور تے فعال کرݨ کیتے کم کیتے ۔ او آئی سی دے سیکرٹری جنرل دا دورہ ایں ڳالھ مہاڑ دا موقع ݙیسی جو او آئی سی ھک ارب 90 مسلماناں دیاں امنگاں کوں پورا کرݨ کیتے کیویں خود کوں مزید متحرک کرسڳدی اے جننہاں دی او نمائندگی کریندی اے ۔
