اسلام آباد۔9دسمبر(اے پی پی) صدر مملکت ڈاکٹرعارف علوی بدعنوانی دی بنیادی وجوہات دا پتہ لاوݨ تے بدعنوانی دیاں کارروائیاں کوں بے نقاب کرݨ دی لوڑھ تے زور ݙیندے ہوئیں آکھیے جو کرپشن کوں منڈھوں مکاوݨ کیتے پرعزم، ٹھوس اتے مخلصانہ کوششاں کرتے ہی ھک مضبوط اتے خوشحال پاکستان ابھر سڳدے۔ ایوانِ صدر دے پریس ونگ موجب صدر مملکت اے ڳالھ جمعہ کوں انسداد بدعنوانی دے عالمی ݙینھ دے موقع تے قوم دے ناویں آپݨے پیغام اچ آکھی اے ۔ انہاں آکھیے جو معاشرے دے سارے طبقات دیاں کوششاں دے بغیر کرپشن دا خاتمہ ممکن کائنی، کرپشن عدم استحکام اتے غربت دے ودھارے اچ اہم کردار ادا کریندی اے ، کرپشن کمزور ملکاں کوں ریاستی ناکامی دے پاسے گھن ویندی اے ۔ صدر مملکت آکھیے جو پاکستان اچ بدعنوانی مکاوݨ تے احتساب یقینی بݨاوݨ کیتے ٻہوں کجھ کرݨ دی لوڑھ اے ۔ اڄ بدعنوانی دیاں ساریاں صورتاں کوں ختم کرݨ، نظام حکومت اچ شفافیت اتے احتساب دے ودھارے دے عزم دا اعادہ کریندوں ۔ صدر مملکت آکھیے جو بدعنوانی دی بنیادی وجوہات دا پتہ لاوݨ تے بدعنوانی دیاں کارروائیاں کوں بے نقاب کرݨ دی لوڑھ اے ، کرپشن ترقی پذیر تے ترقی یافتہ ملکاں کوں پیش آندا ھک سنگین چیلنج اے، اخلاقی اتے مالی کرپشن ساݙی قوم کوں پیش آندے سنگین خطریں دے ذمے وار ہن ۔ انہاں آکھیے جو معاشرے کوں ایں لعنت توں پاک کرݨ کیتے مسلسل کوششاں، موثر نگرانی اتے کنٹرول، پرعزم قیادت اتے ھک فعال معاشرے دی لوڑح اے ۔ بدعنوانی دفاع کوں کمزور کریندی اے تے اقتصادی ترقی اچ رکاوٹ پیندی اے۔
