
لاہور۔9دسمبر(اے پی پی):پاکستان مسلم لیگ (ن) پنجاب دے صدر و وفاقی وزیر داخلہ رانا ثنا اللہ خان آکھیے جو عمران خان ڄے مڄے چھوڑن، اسمبلیاں ترورݨ دا اعلان کرن، انتخابات اچ مقابلہ کریسوں، اساں امیدوار چݨݨ کیتے کمیٹیاں ٻݨا ݙتن ڄیڑھیاں ہر حلقے توں مناسب امیدوار دی سفارشات ݙیسن، سابق وزیر اعظم محمد نواز شریف دے ولݨ کیتے استقبال دیاں تیاریاں شروع ہین، ڈیلی میل دی معذرت دے بعد عمران خان اتے انہاں دے چیلے پوری قوم توں معافی منڳن۔ اے ڳالھ انہاں لاہور اچ مسلم لیگ (ن) پنجاب دے اعلی سطح اجلاس دے بعد ٻئے لیگی رہنماواں دے کٹھے میڈیا نال الیندے آکھی۔ انہاں آکھیا جو ڈیلی میل دی معافی شریف فیملی دی بے گناہی دا ثبوت اے جو ڈیلی میل سنگین الزامات دا 5 واری ثبوت ݙیوݨ اچ ناکام تھئے اتے مخالفین دی سازش ناکام تھئی اے، ایںس ازش اچ عمران خان اتے شہزاد اکبر شامل ہن جنہاں ڈیلی میل دے نمائندے سݙ تے غلط معلومات ݙتن جو ول کوئی پاکستان کوں امداد یا گرانٹ نہ ݙیوے۔ انہاں آکھیا جو عمران خان لارے لپے نا لاون اتے تیکھے اسمبلیاں تحلیل کرݨ دا اعلان کرن، اساں ایندا انتخابات اچ مقابلہ کرݨ کوں تیار ہیں۔