اسلام آباد۔9دسمبر(اے پی پی)صدر مملکت ڈاکٹر عارف علوی سی پیک کوں پاکستان، چین، علاقائی اتے ڄڳ دے ٻئے ملکاں کیتے اقتصادی، مالیاتی، ترسیل اتے رابطہ سازی اچ اہم منصوبہ قرار ݙیندے آکھیے جو سی پیک اچ ٻئے ملکاں دے رلݨ اتے ایندے توں فیدہ چاوݨ دا خیر مقدم کریسوں۔ اے ڳالھ انہاں ایوان صدر اچ چینی سفیر نونگ رونگ نال ملݨ ویلھے اکھی۔ انہاں آکھیا جو سی پیک ہک تزویراتی منصوبہ اے، ایں سانڳے خصوصی اقتصادی زونز دا فعال تھیوݨ اہم اے، چینی آئی ٹی سیکٹر خصوصی اقتصادی زونز اچ سرمایہ کاری کرے، پاکستان چینی کارکناں اتے شہریاں دے تحفظ کیتے سخت اقدامات کریندا پئے۔ انہاں ݙوطرفہ تعاون، تجارت و سرمایہ کاری سودھا سانڄھے تعلقات ٻئے تکڑے کرݨ دے مواقع تے الایا۔
