اسلام آباد۔12دسمبر(اے پی پی) وفاقی وزیر آئی ٹی و ٹیلی کمیونیکیشن سید امین الحق آکھیے جو حکومت شہری اتے دیہاتی علاقیں وچال ڈیجیٹل ونڈ مکاوݨ کیتے پرعزم اے، وزارت آئی ٹی بہتر ڈیجیٹل مستقبل کیتے ہرممکن اقدامات کریندی پئی اے ، پرے دے علاقیں اچ ٹیلی کام سروسز ݙیوݨ کیتے مختلف پراجیکٹس تے کم جاری اے ۔ وفاقی وزیر آئی ٹی سید امین الحق ،پاکستان- آئی ٹی یو ڈیجیٹل انکلیوژن ویک’دی افتتاحی تقریب توں خطاب کریندے پئے ہن جیں دا انعقاد وزارت آئی ٹی اتے انٹرنیشنل ٹیلی کمیونیکیشن یونین(آئی ٹی یو) دے تعاون نال کیتا ڳیا ۔ایں موقع تے وفاقی وزیر آئی ٹی سید امین الحق آکھیے حکومت پاکستان انٹرنیشنل ٹیلی کمیونیکیشن یونین دی پاکستان کیتے تریمتاں کوں بااختیار بݨاوݨ ، ٻالاں دی آن لائن پروٹیکشن اتے آئی سی ٹی تئیں رسائی دے حوالے نال سپورٹ تے شکرگزار اے، تریمتاں کوں بااختیار بݨاوݨ حکومت پاکستان دی اولین ترجیح اے، نینگراں تے ٻالاں کوں ڈیجیٹل مہارتاں سکھاوݨ کیتے بھرپور اقدامات کریندے پیوں ۔ انہاں آکھیے مصنوعی ذہانت، بگ ڈیٹا، کلائوڈ کمپیوٹنگ، موبائل روبوٹکس ویلھے دی اہم لوڑھ بݨ چکئن۔
