صحت دے شعبے اچ وݙے پیمانے تے اصلاحات دا عمل جاری اے،ڈاکٹراں دے مسئلے حل کریندے پیوں ،عبدالقادر پٹیل

اسلام آباد۔14دسمبر(اے پی پی) وفاقی وزیر قومی صحت عبدالقادرپٹیل آکھیے صحت دے شعبے اچ وݙے پیمانے تے اصلاحات دا عمل جاری اے،ڈاکٹراں دے مسئلے حل کریندے پیوں ، پاکستان میڈیکل کمیشن دی گلکت بلتستان اچ نویں شاخ کھولیندے پیوں ۔ وزارت صحت توں جاری بیان موجب وفاقی وزیر صحت عبدالقادر پٹیل گلگت بلتستان دے ڈاکٹراں کوں خوشخبری ݙیندے ہوئیں آکھیے جو ہݨ انہاں کوں آپݨے مسئلے حل کراوݨ کیتے اسلام آباد نہ آوݨا پوسی ، پاکستان میڈیکل کمیشن دی گلکت بلتستان اچ نویں شاخ کھولݨ دا فیصلہ کیتے ۔ عوام کوں صحیح تے حقیقی معنیں اچ ریلیف ݙیوݨ کیتے پرعزم ہیسے ۔ اساں عملی کماں تے کارکردگی تے یقین رکھیندوں ۔ عبدالقادر پٹیل آکھیے جو ڈاکٹرز ساݙے معاشرے اچ مسیحا دا درجہ رکھیندن ، ڈاکٹراں دے مسئلیں کوں ترجیحی بنیاداں تے حل کرݨ ساݙا اولین مقصد اے ۔انہاں آکھیے پیپلز پارٹی خدمت دی سیاست تے یقین رکھیندی اے اساں عوامی لوک ہیسے عوام دی خدمت کر تے دل کوں سکون ملدے جیں توں خدا وی راضی تھیندے ۔ وفاقی وزیر آکھیے صحت دے شعبے اچ وݙے پیمانے تے اصلاحات کیتیاں ویندیاں پئں ۔ انہاں اصلاحات دے تنیجے صحت دے شعبے تے چنڳاں اثر پوسی ۔