پاکستان اتے تاجکستان، باہمی تجارت و سرمایہ کاری، تعلقات و تعاون ودھاوݨ، مشترکہ منصوبے تیکھے توڑ پچاوݨ کیتے پر عزم، مشترکہ اعلامیہ

اسلام آباد۔14دسمبر(اے پی پی)پاکستان اتے تاجکستان، باہمی تجارت و سرمایہ کاری، تعلقات اتے تعاون ودھاوݨ سودھا مشترکہ منصوبے تیکھے توڑ پچاوݨ دا عزم دوہرائے۔ اے عزم وزیراعظم شہباز شریف اتے پاکستان دے دورے تے آئے تاجکستان دے صدر امام علی رحمان اسلام آباد اچ ملاقات توں بعد مشترکہ پریس کانفرنس اچ کیتے۔ وزیراعظم شہباز شریف معزز مہمان دی آمد کوں ماݨ ݙیندے آکھیے جو اے دورہ وݙا اہم اے جو تاجکستان ہک اہم وسطی ایشیائی ملک اے، ساݙے تعلقات ٻئے تکڑے تھیندے پن، اساں مختلف شعبیاں اچ ڳانݙھا ودھاوݨ چاہندوں اتے پاکستان وسطی اشیائی ملکاں نال چنڳے روابط چاہندے۔ ایں موقع تے تاجک صدر امام علی رحمان مثالی مہمان نوازی تے وزیراعظم دا شکریہ ادا کریندے آکھیے جو پاکستان نال تاجکستان دے تاریخی اتے ٻھراواں آلے تعلقات ہین، اساں پاکستان نال تجارتی حجم ودھاوݨ چاہندے ہیں ، ایں سانڳے کاسا 1000 اتے دوشنبے اسلام آباد سسٹر سٹیز منصوبے تیکھے توڑ پچاوݨ چاہندوں۔ انہاں آکھیا جو تاجکستان افغان امن استحکام سودھا علاقائی امور تے پاکستان نال رل تے کم کریسی۔ پریس کانفرنس توں بعد تاجکستان دے صدر امام علی رحمان دے دورہ پاکستان دے مشترکہ اعلامیہ تے دستخط کیتے ڳن۔ مشترکہ اعلامیے تے وزیراعظم شہباز شریف اتے پاکستان دے دورے تے آئے تاجکستان دے صدر امام علی رحمان دستخط کیتن۔