اسلام آباد۔15دسمبر(اے پی پی):چیئرمین سینیٹ محمد صادق سنجرانی تاجک صدر امام علی رحمان نال ملاقات کیتی جیں اچ ݙو پاسے تعلقات، سانجھی دلچسپی دے امور سودھے علاقائی صورت حال تے ڳالھ مہاڑ کیتی ۔ سینیٹ سیکرٹریٹ توں جاری بیان موجب چیئرمین سینیٹ تاجک صدر دے دورہ پاکستان دا خیرمقدم کریندے ہوئیں آکھیے جو پاکستان اتے تاجکستان دے درمیان پراݨے برادرانہ تعلقات ہن ۔ تاجک صدر دا دورہ پاکستان عوام تے حکومت کیتے باعث مسرت اے۔ انہاں آکھیے وسطی ایشیائی ریاستاں کوں گوادر بندرگاہ توں بھرپور فیدہ چاوݨا چاہیدے ۔ گوادر بندرگاہ توں تجارت کیتے ہر طرح دیاں سہولتاں ݙیوݨ کیتے تیار ہیسے۔ چیئرمین سینیٹ کاسا۔ 1000 منصوبے دی وختی تکمیل دی خواہش دا اظہار کریندے ہوئیں آکھیے جو پاکستان وسط ایشیائی ملکاں دے نال تجارت اتے اقتصادی رابطے دا ودھارا چاہندے ۔تعلیم، تجارت اتے انرجی سیکٹرز سودھے مختلف شعبیں اچ ݙو پاسے تعلقات کوں ودھاوݨ کیتے کوشاں ہیسے ۔ پاکستان پہلا ملک ہئی جیں اپݨی آزادی دے بعد تاجکستان کوں منیا ۔ تاجکستان ٻئے وسطی ایشیائی ریاستاں دے نال نال یورپ کیتے ھک گیٹ وے ہے ۔ ݙوہیں ملکاں وچال پارلیمانی وفد دے تبادلیں کوں ودھاوݨا چاہیدے ۔ انہاں آکھیے جو مشترکہ اقتصادی کمیشن، سماجی، ثقافتی، اقتصادی، تکنیکی تے سیاسی تعاون کوں ودھاوݨ اچ اہم کردار ادا کریسی ۔ تاجکستان دے نال سی پیک منصوبے دے تحت تجارتی مواقع پیدا کرݨ دے خواہشمند ہن۔
