اسلام آباد۔15دسمبر(اے پی پی)وزیراعلیٰ پنجاب چودھری پرویز الہٰی تونسہ دے واسیاں دا وݙا مطالبہ منیدے تونسہ شریف کوں ضلع دا درجہ ݙیوݨ دی حتمی منظوری ݙتی اے۔ اے منظوری انہاں لاہور اچ ڈیرہ غازیخان دے اراکین قومی و صوبائی اسمبلی خواجہ شیرازمحمود، سردار محمد خان لغاری، سردار سیف الدین کھوسہ، سردار محمد محی الدین کھوسہ، سردار جاوید اختر لنڈ، مخدوم رضا، سردار علی رضا دریشک، رائے ظہور نال ملݨ ویلھے ݙتی۔ ایں موقع تے پرنسپل سیکرٹری وزیراعلیٰ پنجاب محمد خا ن بھٹی وی موجود ہن۔ چودھری پرویز الٰہی آکھیا جو عوام دے دیرینہ مطالبے تے تونسہ کوں ضلع ٻݨاوݨ دی منظوری ݙتی اے اتے ایندا اعلان میں پہلے ہی 2005 اچ تونسہ دے ایم این اے خواجہ شیراز محمود دے جلسے اچ کیتا ہا، اتے اللہ دا شکر اے جو اڄ تونسہ کوں ضلع ٻݨاوݨ دی حتمی منظوری وی میں ہی ݙتی اے اتے تونسہ دے لوکاں نال کیتا وعدہ توڑ پچائے۔ انہاں آکھیا جو ضلع ٻݨݨ نال تونسہ دے انتظامی امور اچ بہتری آسی، تعلیم، صحت اتے ٻیاں سہولتاں ملسن، اے فیصلہ ارکان اسمبلی اتے عوام دے سکھ کیتے کیتا ڳئے۔ ملاقات اچ ارکان اسمبلی تونسہ کوں ضلع ٻݨاوݨ تے وزیراعلیٰ پنجاب چودھری پرویز الہٰی دا شکریہ ادا کیتے۔
