اسلام آباد/لاہور۔16دسمبر(اے پی پی)صدر مملکت ڈاکٹر عارف علوی انفارمیشن اینڈ کمیونیکیشن ٹیکنالوجی(آئی سی ٹی) دے شعبے کوں ملکی معیشت کیتے “گیم چینجر” قرار ݙیندے آکھیے جو ساکوں اپݨی سمت درست کرݨی ہوسی تاں جو اساں 2 توں 3 سال اچ آئی ٹی سیکٹر اچ 15 بلین ڈالر سالانہ تئیں کما سڳوں۔ اے ڳالھ انہاں پنجاب انفارمیشن ٹیکنالوجی بورڈ لاہور اچ ویب 3.0 دی لانچنگ تقریب نال خطاب اچ آکھی۔ وزیر خزانہ پنجاب محمد محسن خان لغاری، وزیر اعلی دے خصوصی مشیر انفارمیشن ٹیکنالوجی ڈاکٹر ارسلان خالد، پنجاب انفارمیشن ٹیکنالوجی بورڈ(PITB) دے چیئرمین سید بلال حیدر، انفارمیشن ٹیکنالوجی یونیورسٹی (ITU) دے وائس چانسلر ڈاکٹر سرفراز خورشید، آئی ٹی پروفیشنلز، کاروباری شخصیات اتے میڈیا پرسنز وی موجود ہن۔ صدر مملکت آکھیا جو سائبر دے شعبے اچ 80 ملین تربیت یافتہ انسانی وسائل دی لوڑھ اے جیکر اساں صرف ایں شعبے اچ لوکاں کوں تربیت ݙے سڳوں تاں ملک اچ بے روزگاری مک سڳدی اے، ساکوں ترقی اچ ڄڳ نال رلݨ کیتے پالیسی سازی عمل کون تیکھا کرݨا ہوسی اتے جدید ٹیکنالوجی اپناوݨی ہوسی، ایں سانڳے ودھ توں ودھ آئی ٹی گریجوایٹس تیار کرݨے ہوسن، چاہندے ہیں جو پاکستان سائبر سکیورٹی اتے سائبر ڈیفنس اچ تکڑا تھیوے۔
