سیالکوٹ۔18دسمبر(اے پی پی) وزیر دفاع خواجہ محمد آصف آکھیے جو عمران خان ملکی دفاع دے ادارے کوں متنازع بݨاوݨ دی کوشش کیتی لیکن ناکامی ایندا مقدر بݨی۔ گزریل مہینے 29 نومبر کوں آرمی چیف دی تعیناتی دا عمل مکمل تھیا جیں کوں عمران خان کوں وی قبول کرݨا پئے ، عمران خان10 سال تئیں وزیراعظم بݨݨ دے خواب ݙیکھدا پیا ہئی ، عمران خان ملکی معیشت کوں ودھ سارا ضیان پڄائے ۔ اے ڳالھ انہاں اتوار کوں اتھاں سیالکوٹ اچ ھک ورکرز کنونشن توں خطاب کریندے ہوئیں آکھی اے ۔ انہاں آکھیے عمران خان دی حکومت دے 4 سالاں اچ ملکی معیشت کوں تباہ و برباد کر تے رکھ ݙتا ڳیا ۔ اساں گزریل 8 مہینے توں ملکی معیشت کوں سنبھالا ݙیوݨ تے مہانگ کوں قابو کرݨ کیتے ݙینھ رات کوشاں تے پرعزم ہیسے جو ملکی معیشت کوں مستحکم کرݨ اچ ضرور کامیاب تھی ویسوں ۔ انہاں آکھیے آندے ݙینھ سامݨے آوݨ آلی آڈیو لیکس اچ عمران خان دے کوڑ تے چوریاں سامݨے آچکن۔ ایں بندے 6 ارب روپے دے تحفے 1.5 کروڑ اچ ڳھدے ، ایں تے اتنے کیسز بݨدن جو ڳنتری وی نی کیتی ونڄ سڳدی ۔ اے ڄاݨدے جو عوام اچ ایندی مقبولیت گھٹدی پئی اے تے ایہا وجہ اے جو اے انتخابات کراوݨ دا راگ الاپی کھڑے لیکن انتخابات ملکی آئین و قانون دے مطابق اپݨے مقررہ وقت تے تھیسن عمران خان دے آکھݨ یا بلیک میلنگ توں انتخابات کائناں تھیسن۔ انہاں آکھیےعمران خان اپݨے ذہن اچ آرمی چیف دی تعیناتی ٻلہائی ہوئی ہئی تے اے بندہ چاہندا ہئی جو اڳلے 10 سال تئیں وی ایہو وزیراعظم رہے اتے ایں توں وجہ توں اوں ھک اہم ادارے کوں متنازع بݨاوݨ دی کوشش کیتی ، اے احسان فراموش شخص اے ایندی ملک کیتے کوئی وفاداری کائنی ، میں اپݨے نینگراں کوں آکھداں جو ایں بندے توں آپݨے مستقبل دی امیداں نہ ٻدھو ۔ اے جئیں کوں ڈاکو آکھدا ہئی اڄ اوندے نال ٻیٹھے۔
