اسلام آباد۔21دسمبر(اے پی پی) وزیر خارجہ بلاول بھٹو زرداری امریکی وزیر خارجہ انٹونی جے بلنکن نال پاکستان اچ سیلاب توں تھیوݨ آلی تباہی اتے متاثرہ علاقیں دی بحالی سودھے مختلف امور تے ڳالھ مہاڑ کیتی ۔ ترجمان دفتر خارجہ توں جاری بیان موجب ݙوہیں وزرا خارجہ گزریل ݙینھ تھیوݨ آلی ڳالھ مہاڑ اچ ݙو طرفہ تعلقات، افغانستان دی صورتحال سودھے سانجھی دلچسپی دے علاقائی امور تے ڳالھ مہاڑ کیتی ڳئی ۔ بیان موجب ݙوہیں پاسوں ݙوطرفہ تعلقات دے مثبت انداز تے اطمینان دا اظہار کیتے تے وسیع البنیاد ایجنڈے تے عمل پیرا تھیوݨ دی سانجھی خواہش دا اعادہ کیتے۔ وزیر خارجہ بلاول بھٹو زرداری پاکستان اچ سیلاب دے بعد 97 ملین ڈالردی انسانی امداد ݙیوݨ تے امریکی حکومت دا شکریہ ادا کیتے۔ انہاں امریکی وزیر خارجہ انٹونی جے بلنکن کوں پاکستان دی طرفوں بحالی اتے متاثرہ علاقیں اچ نویں سروں تعمیر کیتے اقدامات بارے ݙسایا ۔ انہاں امریکی وزیر خارجہ کوں 9 جنوری 2023 کوں جنیوا اچ پاکستان دی بحالی اتے نویں سروں تعمیر کیتے کوششاں اچ تعاون کیتے منعقد تھیوݨ آلی بین الاقوامی کانفرنس بارے ݙسایا ۔ امریکی وزیر خارجہ ایں موقع تے پاکستان کوں سیلاب متاثرین دی بحالی اتے نویں سروں تعمیر دے چیلنج دا سامݨا کرݨ اچ امریکی انتظامیہ دی مسلسل حمایت دا اعادہ کیتے۔
