اسلام آباد۔22دسمبر(اے پی پی) قومی اسمبلی سیکرٹریٹ آکھیے جو سپیکر قومی اسمبلی راجہ پرویز اشرف پی ٹی آئی دے ارکان کوں فرداً فرداً قومی اسمبلی دے قواعد و ضوابط دے مطابق انہاں دے استعفیں دی تصدیق کیتے اپݨے چیمبر اچ سݙیسن ۔ قومی اسمبلی سیکرٹریٹ توں پاکستان تحریک انصاف دے وائس چیئرمین شاہ محمود قریشی کوں لکھیے ڳئے ھک جوابی خط اچ آکھیا ڳئے جو کہیں وی رکن دے استعفیٰ کوں منظور کرݨ کیتے قومی اسمبلی دے قواعد و ضوابط 2007، چیئر دی رولنگز، اعلیٰ عدلیہ دے فیصلیں دے مطابق اصول وضع ہن۔ خط اچ قومی اسمبلی دے قواعد و ضوابط دے قاعدہ 43، اسلام آباد ہائی کورٹ دا فیصلہ جیں دی سپریم کورٹ وی توثیق کیتی، دا حوالہ ݙیندے ہوئیں آکھیے جو پاکستان تحریک انصاف دے جنہاں ارکان 11 اپریل 2022 کوں مستعفی تھیوݨ دا اعلان کیتا ہئی انہاں کوں قومی اسمبلی سیکرٹریٹ دی طرفوں 30 مئی 2022ء کوں انہاں دے استعفیں دی تصدیق کیتے 6 توں 10 جون کوں سݙیا ڳیا ہئی لیکن انہاں اچوں کوئی وی رکن آپݨے استعفیں دی تصدیق کیتے سپیکر چیمبر اچ نی آیا۔ خط اچ آکھیا ڳئٖ جو ایں ساری صورتحال دے تناظر اچ سپیکر قومی اسمبلی ھک واری ول انہاں ارکان کوں آپݨے استعفیں دی تصدیق کیتے اپݨے چیمبر اچ سݙیسن تاں جو او قومی اسمبلی دے قواعد و ضوابط دے قاعدہ 43 بی دے ذیلی قاعدہ (2 )دے تحت اپݨے استعفیں دی تصدیق کراسڳن ۔
