اسلام آباد۔22دسمبر(اے پی پی) وزیراعظم محمد شہباز شریف آکھیے شمسی توانائی ویلھے دی اہم لوڑھ اے ، معیشت دی بہتری اتے ایندھن دی مد اچ درآمدی ٻل اچ کمی کیتے شمسی توانائی دا ودھارا ناگزیر اے ،شمسی توانائی تے منتقلی توں سرکاری اداریں دے بجلی دے ٻلاں اچ خاطر خواہ کمی تھیسی ۔ اے ڳالھ انہاں ملک اچ شمسی توانائی دے ودھارے دے حوالے نال اجلاس دی صدارت کریندے ہوئیں آکھی ۔ اجلاس اچ وفاقی وزیر خزانہ و محصولات اسحاق ڈار ، وفاقی وزیر تجارت سید نوید قمر ، وفاقی وزیر توانائی انجنیئر خرّم دستگیر ، مشیر وزیراعظم احد چیمہ ،وزیراعظم دے معاونین خصوصی محمد جہانزیب خان ، طارق باجوہ اتے اعلیٰ سرکاری افسران شرکت کیتی۔ وزیراعظم اجلاس توں خطاب کریندے ہوئیں آکھیے جو شمسی توانائی صاف اتے سستی بجلی حاصل کرݨ دا بہترین ذریعہ اے اتے ویلھے دی اہم لوڑھ اے۔ وزیراعظم آکھیے معیشت دی بہتری اتے ایندھن دی مد اچ درآمدی ٻل اچ کمی کیتے شمسی توانائی دا ودھارا نا گزیر اے۔ انہاں مزید آکھیے نجی سطح تے وی شمسی توانائی دے استعمال کوں ودھارا ݙیوݨ دے حوالے نال ضروری اقدامات کیتے ونجن ۔ اجلاس اچ ݙسایا ڳئے جو وفاقی کابینہ پورے ملک اچ مہانگے ایندھن دی جاہ شمسی توانائی توں بجلی بݨاوݨ دے حوالے نال فریم ورک منظور کر چکی اے ۔ بریفنگ اچ مزید ݙسایا ڳئے جو نیشنل الیکٹرک پاور ریگولیٹری اتھارٹی ایں مہینے دے چھیکڑ تئیں شمسی توانائی دے وݙے پراجیکٹس دے ٹیرف دا تعین کرگھنسی تے جیں دے بعد متبادل توانائی دی ترقی دے بورڈ دی طرفوں سرمایہ کاراں توں ٻولیاں ڳھدیاں ویسن ۔ بریفنگ اچ ݙسایا ڳئے جو شمسی توانائی توں بجلی بݨاوݨ دے حوالے نال ترائے منصوبے زیر غور ہن جنہاں اچ 1200 میگا واٹ دا منصوبہ لیہ اچ جݙاں جو 600 میگا واٹ دے منصوبے مظفر گڑھ اتے تریموں اچ لاتے ویسن ۔ وزیراعظم ہدایت کیتی جو ایں حوالے نال آر ایف پی اتے بڈنگ دا کم تکھا تے شفاف بݨاوݨ دے حوالے نال سارے متعلقہ محکمے ضروری اقدامات کرن۔ اجلاس کوں وزیراعظم دے وفاقی حکومت دی پورے ملک اچ موجود عمارات دی شمسی توانائی تے منتقلی دے ویژن تے وی بریفنگ ݙتی ڳئی ۔ اجلاس کوں ݙسایا ڳئے جو وفاقی حکومت دی عمارات دی شمسی توانائی تے منتقلی دے حوالے نال ماہر کنسلٹنٹ دی خدمات ڳھدیاں ڳئں ۔ وزیراعظم ہدایت کیتی جو ایں سلسلے اچ سارے وفاقی اداریں کیتے سینٹرلائزڈ پروکیورمنٹ کوں اختیار کیتا ونڄے جو موثر تے شفاف ہووے ۔ وزیراعظم ہدایت کیتی جو ایں سلسلے اچ ابتدااسلام آباد دی حدود اچ وفاقی حکومت دی عمارات توں کیتی ونڄے تے بعد اچ پورے ملک اچ موجود سرکاری عمارات کوں شمسی توانائی تے منتقل کیتا ونڄے ۔ وزیراعظم ہدایت کیتی جو گرمی دا موسم شروع تھیوݨ توں پہلے سرکاری عمارات دی شمسی توانائی تے منتقلی کوں یقینی بݨایا ونڄے ۔وزیراعظم آکھیے شمسی توانائی تے منتقلی توں سرکاری اداریں دے بجلی دے ٻل گھٹ ویسن۔
