اسلام آباد۔22 دسمبر(اے پی پی)وزیراعظم محمد شہباز شریف آکھیے جو سارے مذاہب امن، محبت اتے بھائی چارے سکھیندن، پاکستان اچ اقلیتاں کوں سٻھے حقوق ملدن، ملک کوں قائداعظم اتے علامہ اقبال دے افکار دے مطابق ٻمیسوں، نیشنل مینارٹی کمیشن دا ڈرافٹ ٻݨ چکیے جیکوں تیکھے قانون ٻمیسوں، حکومت اقلیتاں دے بنیادی حقوق دے تحفظ دی پاسداری اتے تحفظ دی ضمانت ݙیندی اے۔ اے ڳالھ انہاں وزیراعظم آفس اچ کرسمس دی خصوصی تقریب نال خطاب اچ آکھی۔ ایں موقع تے وفاقی وزیر بین المذاہب ہم آہنگی مفتی عبدالشکور، وفاقی وزیر پارلیمانی امور مرتضیٰ جاوید عباسی اتے رکن قومی اسمبلی جیمز اقبال دے علاوہ ہندو، سکھ، پارسی، بہائی سودھا مختلف کمیونٹیز دے رہنما اتے معززین موجود ہن۔ وزیراعظم مسیحی برادری کوں کرسمس دی مبارک فیندے آکھیے جو اڄ اساں اتھاں مسیحی برادری دی خشیاں اچ رلݨ آئے ہیں، پاکستان ٻݨݨ توں اڄ تئیں مسیحی کمیونٹی پاکستان کیتے بے مثال قربانیاں ݙتن، اساں انہاں دی قدر کریندے ہیں، پاکستان دی ترقی و خوشحالی کیتے جسٹس کارنیلیس، گروپ کیپٹن سیسل چوہدری، سسٹر رتھ فائو سودھا مسیحی برادری دی کئی شخصیات خدمات انجام ݙتن۔ انہاں آکھیے جو سارے مذاہب اپݨے اپݨے دائرے اچ امن، محبت اتے بھائی چارے دی تعلیم ݙیندے پن، ملک اچ مسیحیاں سودھا ہر اقلیت کوں قائداعظم دی سوچ دے مطابق آئین پاکستان دے تحت سارے آئینی و سیاسی حقوق برابر ملدے پن جو او آزادی نال جی سڳن۔ انہاں آکھیا جو دہشتگردی پاکستان کوں وݙا متاثر کیتے، اقلیتاں کوں اوکھ ٻھوڳݨے پن ٻھل ول اساں دہشت گردی اتے انتہاء پسندی مکائی اے، اینس انڳے پوری قوم، افواج پاکستان اتے قانون نافذ کرݨ آلے اداریاں وݙیاں قربانیاں ݙتن، اساں انہاں قربانیاں کوں ونڄاوݨ نا ݙیسوں۔ انہاں آکھیا جو اقلیتاں دا تحفظ یقینی ٻݨایا ویسی، جتھاں وی امن و امان اچ رکاوٹ آسی اتے زیادتی تھیسی تاں قانون برداشت نہ کریسی، پاکستان کوں علامہ اقبال دے فرمودات اتے قائداعظم محمد جناح دے خواب دی تعبیر ٻݨیسوں۔ انہاں مسیحی رہنما دے مطالبہ تے ایڈورڈز کالج پشاور دے معاملہ دا جائزہ ڳھنݨ دی وی یقین دہانی کرائی۔ چھیکڑ تے وزیراعظم سارے اقلیتی کمیونٹیز دے نمائنداں دے نال کرسمس دا کیک وی کٹیے۔
