اسلام آباد۔23دسمبر(اے پی پی) وزیراعظم شہباز شریف اسلام آباد دے سیکٹر آئی 10 فور اچ خود کش دھماکے دی مذمت کریندے ہوئیں واقعہ دی رپورٹ منگ ڳھدی ۔ وزیراعظم آفس دے میڈیاونگ توں جاری بیان موجب وزیراعظم اسلام آباد پولیس دے شہید ہیڈ کانسٹیبل عدیل حسین کوں خراج عقیدت پیش کریندے ہوئیں آکھیے جو پولیس اہلکاراں اپݨے لہو دا نذرانہ ݙے تے دہشت گرداں کوں روکیا ، قوم اپݨے بہادراں کوں سلام پیش کریندی اے ۔ وزیراعظم آکھیے پوری قوم رل تے دہشت گردی مکاوݨ تئیں جنگ جاری رکھیسی ۔ وزیراعظم واقعہ اچ زخمی تھیوݨ آلیں نال ہمدردی کیتی تے زخمیاں کوں بہترین طبی سہولتاں ݙیوݨ دی ہدایت کیتی ۔ وزیراعظم آکھیے الحمدللہ! قانون نافذ کرݨ آلے اداریں دی وختی کاروائی توں بے گناہواں دا خون وہݨ دا وݙا تے مذموم منصوبہ ناکام تھی ڳئے ، عوام دہشت گردی مکاوݨ کیتے آپݨی فورسز نال بھرپور تعاون کرن ۔ وزیراعظم شہید پولیس اہلکار کوں شہدا پیکج ݙیوݨ تے آئی جی اسلام آباد ڈاکٹر اکبر ناصر خان کوں غیرمعمولی بہادری دا مظاہرہ کرݨ آلے اہلکاراں کوں انعام تے تعریفی سنداں ݙیوݨ دی ہدایت کیتی ۔ وزیراعظم آکھیے دہشت گرد پاکستان دے دشمن اتے عوام دے قاتل ہن، رض پاک کوں ایں فتنے توں پاک کرتے دم گھنسوں ۔ وزیراعظم شہید عدیل حسین دے اچے درجے تے زخمیاں دی وختی صحت کیتے دعا منگی۔
