اسلام آباد۔23دسمبر(اے پی پی) وزیر اعظم شہباز شریف آکھیے پاکستان کنے انفارمیشن ٹیکنالوجی دے شعبے اچ ٻہوں زیادہ استعداد اے، جیں قدر ٹیلنٹ تے ہنر پاکستان اچ اے ایں دے مقابلے اچ آئی ٹی برآمدات کافی گھٹ ہن جنہاں کوں ودھاوݨ کیتے ترجیحی بنیاداں تے کم کیتا ویسی ۔ اے ڳالھ انہاں جمعے کوں اتھاں انفارمیشن ٹیکنالوجی خصوصاً آئی ٹی دے شعبے اچ برآمدات دے ودھارے دے حوالے نال اہم اجلاس دی صدارت کریندے ہوئیں آکھی اے ۔ وزیراعظم آکھیے ملک اچ انفارمیشن ٹیکنالوجی دے شعبے اچ ٻہوں زیادہ استعداد اے جیں دا چنڳاں فیدہ چاوݨ دی لوڑھ اے ۔ انہاں آکھیے پاکستانی اینٹرپرنیورز آئی ٹی سیکٹر دے ودھارے تے ترقی اچ اہم کردار ادا کیتے ،تاں جو پاکستان دی آئی ٹی سیکٹرز دی برآمدات پاکستان اچ آئی ٹی سیکٹر دے ٹیلنٹ اتے استعداد دے مقابلے کافی گھٹ ہن۔ وزیراعظم آکھیے آئی ٹی سیکٹر دی برآمدات ودھاوݨ کیتے ترجیحی بنیاداں تے کم کرݨ دی لوڑھ اے ، ایجھے برآمد کنندگان جنہاں آئی ٹی برآمدات اچ ودھارے کیتے کردار ادا کیتے انہاں کوں حکومتی سطح تے حوصلہ ݙتا ویسی ۔اجلاس کوں ݙسایا ڳئے جو گزریل سال پاکستان دی آئی ٹی برآمدات 2.6بلین امریکی ڈالرز رہن تے بھرپور کوشش کیتی ویندی پئی اے جو وزیراعظم دے ویژن دے مطابق انہاں برآمدات کوں اجوکے سال 5 بلین امریکی ڈالرز تئیں ودھایا ویسی ۔ بریفنگ اچ ݙسایا ڳئے جو پاکستان کنے دنیا اچ ݙوجھی وݙی فری لانس افرادی قوت موجود اے جیں دی استعداد ودھاوݨ کیتے پاکستان سافٹ ویئر ایکسپورٹ اقدامات کریندا پئے ۔ اجلاس کوں ݙسایا ڳئے جو آئی ٹی انڈسٹری اچ نویں لوکاں دی شمولیت کیتے یونیورسٹیاں اچ آئی ٹی دے حوالے نال ݙو سالہ ایسو سی ایٹ ڈگری پروگرامز شروع کرݨ تے غور کیتا ویندا پئے ۔ اجلاس اچ آکھیا ڳئے آرٹیفیشل انٹیلیجینس، سائبر ٹیکنالوجی، چین اتے کلاؤڈ ٹیکنالوجی وی حکومتی ترجیحات دا حصہ ہن۔ وزیراعظم ہدایت کیتی جو متعلقہ وزراء اتے افسران آئی ٹی برآمد کنندگان نال ھک تفصیلی ملاقات کرن تے انہاں دے سارے مسئلے ترجیحی بنیاداں تے حل کرݨ کیتے اقدامات کرن۔ وزیراعظم آئی ٹی برآمدات دے موجودہ حجم تےعدم اطمینان کریندے ہوئیں آکھیے جیں قدر ٹیلنٹ تے ہنر پاکستان اچ آئی ٹی دے حوالے نال موجود ایں دے مقابلے پاکستان توں آئی ٹی برآمدات کافی گھٹ ہن جنہاں کوں ودھاوݨ کیتے ترجیحی بنیاداں تے کم کیتا ونڄے ۔اجلاس اچ وفاقی وزیر خزانہ و محصولات اسحاق ڈار ، وفاقی وزیر تجارت سید نوید قمر، وفاقی وزیر انفارمیشن ٹیکنالوجی و ٹیلی کام امین الحق ،وزیراعظم دے معاونین خصوصی طارق باجوہ، جہانزیب خان، سید فہد حسین ، شزا فاطمہ اتے اعلی سرکاری افسران شرکت کیتی ۔
