اسلام آباد۔4جنوری(اے پی پی) تھنک ٹینک انسٹی ٹیوٹ آف پیس اینڈ ڈیویلپمنٹ (انسپاڈ )دے صدر ڈاکٹر محمد طاہر تبسم آکھیے جو کشمیریاں کوں حق خود ارادیت ݙتے بغیر جنوبی ایشیاُ اچ امن ناممکن ، اقوام متحدہ پنج جنوری 1949 دی قرارداد تے عمل درآمد کراوݨ دی پابند اے ، خطے اچ قیام امن، ترقی اتے انتہا پسندی مکاوݨ کیتے کشمیر دا پرامن حل ٻہوں ضروری اے۔ یوم حق خودارادیت دے موقع تے ھک بیان اچ ڈاکٹر طاہر تبسم آکھیے کشمیریاں تے ظلم کرݨ ، اقلیتاں دے حقوق کھسݨ تے قتل عام توں بھارت دی ونڈدا عمل شروع تھیوݨ آلا اے جیں کوں روکݨ اقوام متحدہ اتے عالمی طاقتاں دے وس اچ نہ رہسی ۔انہاں آکھیے سکھ، ہندو دلت اتے باقی اقلیتاں اتے ریاستاں ہندو انتہا پسنداں دے ظلم توں تنگ آچکن ، انصاف اتے امن پسند ملکاں بھارتی ہندو توا تے آر ایس ایس دی دہشت گردی اتے انتہاپسندی توں تنگ ہن۔انہاں آکھیے کشمیر تے فلسطین دی آزادی دیاں تحریکاں خوفناک شکل اختیار کرسڳدن ، کشمیر پہلے ہی نیوکلیر فلیش پوائنٹ بݨ چکیے جیڑھا جو کہیں ویلھے بھارت دی سلھ نال سلھ وڄا سڳدے۔ انہاں آکھیے مودی حکومت کوں وختی پاکستان نال مسئلہ کشمیر تے مذاکرات شروع کرݨے چاہیدن نتاں دیر نہ تھی ونڄے تے سارا خطہ شعلیں دی وٹھ اچ آسڳدے ۔محمد طاہر تبسم آکھیے کشمیریاں دیاں ضائع نی ونڄ سڳدیاں، او قوم کݙاہیں آزادی دے بغیر نی رہ سڳدی جیں کوں موت اچ مزا آوݨ لڳ ونڄے ،کشمیری قوم آپݨی آزادی اتے حق خودارادیت کیتے ترائے نسلاں دی قربانی ݙتی اے ۔
