اسلام آباد۔11جنوری (اے پی پی):عالمی بینک مالی سال 2023 اچ پاکستان دی مجموعی قومی پیداوار(جی ڈی پی) اچ 2فیصد نمو دی پیشنگوئی کیتی اے ۔ اے ڳالھ عالمی بینک دی طرفوں جاری عالمی اقتصادی منظرنامہ اچ آکھی ڳئی اے ۔ ایندے توں پہلے اکتوبراچ وی عالمی بینک آپݨے جائزیں اچ جی ڈی پی اچ ݙو فیصد نمو دی پیشنگوئی کیتی ہئی ۔ رپورٹ اچ آکھیا ڳئے جو پاکستان دی معیشت مشکلات دی شکار اے ، زرمبادلہ دے ذخائرگھٹ ہن ، مالی گھاٹا تے گزریل سال آوݨ آلے سیلاب دے نتیجے اچ مشکلات مزید ودھ ڳئن ، گزریل سال ساوݨ وسݨ آلے ودھ سارے مینھ توں زراعت، بنیادی ڈھانچہ تے لائیو سٹاک کوں ٻہوں ضیان پڄے ، زراعت پاکستان دی مجموعی قومی پیداوار دا 23فیصد اے جݙاں جو روزگارݙیوݨ اچ ایندا حصہ 37فیصد توں ودھ اے ۔ رپورٹ اچ آکھیا ڳئے جو جون توں دسمبر تئیں دی مدت اچ امریکی ڈالردے مقابلے اچ پاکستانی کرنسی دی قدر اچ 14فیصد گھٹکی تھئی ۔ صارفین کیتے بنیادی چیزاں دی مہانگ دسمبراچ سالانہ بنیاداں تے 24.5فیصد دی سطح تے پڄن ۔ رپورٹ اچ آکھیا ڳئے جو پاکستان اچ آوݨ آلے اڄوکے سیلاب توں مجموعی قومی پیدوار(جی ڈی پی) دا 4.8فیصد ضیان تھئے ۔
