ملتان۔19جنوری (اے پی پی) ایڈیشنل چیف سیکرٹری جنوبی پنجاب کیپٹن ر ثاقب ظفر آکھیا جو جنوبی پنجاب وطن عزیز دا ہک اہم خطہ اے اتے ہک وکھری تہذیب تے ثقافت دا امین اے۔ انہاں آکھیا جو جنوبی پنجاب سیکرٹریٹ دا مقصدعوام دے مسئلے انہاں دے در تے حل کرݨ اے، خطے اچ شرح خواندگی ودھاوݨ اتے غریبی مکاوݨ اساݙا ٹارگٹ اے۔ جنوبی پنجاب سیکرٹر یٹ دا دورہ کرݨ آلے پولیس ڈیپارٹمنٹ دے زیر تربیت اے ایس پیز توں خطاب کریندیں ہوئیں انہاں آکھیا جو صوبائی کابینہ جنوبی پنجاب کیتے 32 فیصد جاب کوٹہ مقرر کر ݙتا ڳے اتے جنوبی پنجاب دے علاوہ صوبے دے ٻے ضلعیاں کیتے 68 فیصد اتے اوپن میرٹ کیتے ݙاہ فیصد کوٹہ مقرر کر ݙتا ڳے۔ انہاں ݙسیا جو چولستان اچ مصنوعی مینہ وساوݨ کیتے سسٹم دی سٹڈی جاری اے اتے قحط سالی جیھے مسئلے تے قابو پاتا ویسی۔ ایں موقع تے سیکرٹری سکول ایجوکیشن ڈاکٹر احتشام انور، سیکرٹری پرائمری اینڈ سیکنڈری ہیلتھ محمد اقبال، سیکرٹری پی اینڈ ڈی آفتاب پیرزادہ اتے ایس ایس پی عمر ریاض موجود ہن۔
