اسلام آباد۔19جنوری (اے پی پی) وزیر مملکت برائے خزانہ تے محصولات عائشہ غوث پاشا آکھیا جو آئی ایم ایف پروگرام کوں ایں طریقے نال اڳوں ودھایا وںجے جو سخت فیصلیاں دا ٻوجھ عام بندے تے نہ پووے۔ اے ڳالھیں انہاں خمیس کوں سینٹ دی قائمہ کمیٹی برائے خزانہ دے اجلاس دے بعد صحافیاں نال ڳالھ مہاڑ کریندیں ہوئیں آکھی۔ انہاں آکھیا جو حکومت دی اقتصادی ٹیم آئی ایم ایف پروگرام ابرے وزیراعلیٰ نال میٹنگز کریندی پی اے۔ وزیراعظم عام بندے خصوصی طور ڳھٹ آمدݨ آلے طبقے تے ٹیکس دا ٻوجھ نی پاوݨ چاہندے۔ آئی ایم ایف نال مذاکرات دی تاریخ دے سوال تے انہاں آکھیا جو حکومت آئی ایم ایف نال پروگرام چاہندی اے پر ایں کیتے پہلے تفصیلی کم تھیسی۔ حکومت آئی ایم ایف کوں گزریل مون سون اچ آوݨ آلے چھل پاروں پاکستان اچ زمینی صورتحال اتے حقائق دے مطابق قائل کرݨ چاہندی اے۔ ایں ویلھے چھل متاثرہ علاقیاں اچ عوام دی ہک وݙی تعداد اوکھ اچ اے ایجھے حالات اچ ٻیا ٻوجھ پاوݨ ناممکن اے۔ ایں توں پہلے سینٹ دی قائمہ کمیٹی برائے خزانہ کوں بریفنگ ݙیندیں ہوئیں انہاں آکھیا جو پاکستان ایں ویلھے غیر معمولی صورتحال دا سامݨا کریندا پے۔
