نارووال۔22جنوری(اے پی پی) وفاقی وزیر منصوبہ بندی ترقی و اصلاحات احسن اقبال آکھیے وفاقی حکومت اپݨی مدت پوری کریسی ، اکتوبر الیکشن دا مہینہ ہوسی ،ملکی معیشت کوں مستحکم کرتے پیراں تے کھڑا کریندے پیوں ، تحریک انصاف آپݨے چار سالہ دور حکومت اچ معیشت تباہ کیتی ، عمران خان کوں چیلنج کرینداں او نارووال توں الیکشن لڑن عبرت ناک شکست ݙیسوں ، عمران خان پنجاب اتے کے پی کے دی اسمبلی تحلیل تے خود کوں بے یار ومددگار کرݙتا ، پنجاب دے نگران وزیراعلی کیتے محسن نقوی دا ناں ہی فائنل تھیسی ،مریم نواز پاکستان آتے پارٹی دی تنظیم سازی کوں منظم کریسن ، قائد مسلم لیگ ن میاں محمد نواز شریف وی جلدی پاکستان آسن تے انشاء اللہ انہاں کوں ضرور انصاف ملسی ، نارووال سپورٹس کمپلیکس کوں تحریک انصاف دی حکومت تباہ کر تے ملک و قوم دا ضیان کیتے ۔اے ڳالھیں انہاں اتوار کوں نارووال سپورٹس کمپلیکس دا دورے تے میڈیا نال ڳالھ مہاڑ کریندے ہوئیں آکھئن ۔ انہاں آکھیے 2019اچ نارووال سپورٹس کمپلیکس90 فیصد مکمل ہئی جیں تے ٹوٹل 70کروڑ رو پے لاگت درکار ہئی مگر تحریک انصاف ایں منصوبے کوں روک تے میں تے بے بنیاد مقدامیں بما تے ضیان کیتا ، میکوں جیل وی سٹیا ڳیا ، تحریک انصاف دی نا اہلی توں 4سال دے التواء دے بعد ہݨ کنسلٹنٹ ایں منصوبے دا جیڑھا تخمینہ لاتے اوں مطابق 70کروڑ دا منصوبہ ہݨ 3.10ارب اچ مکمل تھیسی ، اتنی لاگت اچ ھک نواں سپورٹس کمپلیکس بݨ سڳدے ،انشاءاللہ ہݨ اے ضیان اساں عمران خان توں پورا کرویسوں تے ایندا حساب گھنسوں ۔پنجاب اچ تحریک انصاف دی حکومت جیڑھی کرپشن کیتی ایندا حساب عوام الیکشن اچ گھنسی ،شہباز شریف دے دور اچ پوری دنیا اچ پنجاب دی ترقی دیاں مثالاں ݙتیاں ویندیان ہن مگر تحریک انصاف دی حکومت کرپشن دا بازار گرم کر تے صوبے کوں تباہ کر ݙتا۔
