کراچی۔23جنوری(اے پی پی)سٹیٹ بنک آف پاکستان شرح سود ہک فیصد ودھا تے 16 توں 17 فیصد کر ݙتی اے۔ گورنر اسٹیٹ بینک جمیل احمد کراچی اچ پریس کانفرنس کریندے آکھیے جو مانیٹری پالیسی کمیٹی شرح سود 120 پوائنٹس ودھاوݨ دا فیصلہ کیتے جیندے بعد ہݨ شرح سود 17 فیصد ہوسی ڄݙاں جو مہنڳائی دا دبائو حالی وی برقرار اے، نویں انفلوز اچ دیر پاروں زرمبادلہ دے ذخائر تے دباؤ ودھدا پئے، ملک اچ بے یقینی دی صورتحال اے، عالمی حالات پاروں ترسیلات اتے ایکسپورٹ تے اثر پوندا پئے۔انہاں آکھیا جو معاشی ترقی دی شرح نمو دا 2 فیصد دا ہدف اوکھا ہوسی، کاروباری حالات، درآمدات دے مسائل اتے لارج سکیل مینو فیکچرنگ وی دباؤ اچ ہین، جولائی دسمبر جاری کھاتیاں دا خسارہ 3.7 ارب ڈالر رہے، جاری کھاتے دا خسارہ 10 ارب ڈالر توں وی ڳھٹ یعنی 9 ارب ڈالر رہݨ دی توقع اے، مہنگائی تے قابو پاوݨ کیتے شرح سود اچ ہک فیصد ودھارا مجبوری ہا۔ انہاں آکھیا جو روپے دی قدر اچ سٹے بازی دا رجحان اے، بیرونی فنانسنگ دی لوڑھ اتے قرضاں دی ادائیگی پاروں مارکیٹ اچ ریٹ ہائی اے، آئی ایم ایف ریویو پورا تھیوݨ اتے انفلوز آوݨ نال روپے دی قدر مستحکم تھیسی۔ انہاں آکھیا جو آندے 5 مہینے 8 ارب ڈالر قرضے ولا ݙیوݨن، ٻئے 3 ارب ڈالر رول اوور تھیسن، 2.2 ارب ڈالر دی فنانسنگ دی حد ولا بحال تھیسی۔
