اقوام متحدہ۔1فروری(اے پی پی):اقوام متحدہ پشاور اچ پولیس لائنز دی مسیت اچ دہشت گرد حملے تے تشویش دا اظہار کریندے ہوئیں تحریک طالبان پاکستان (ٹی ٹی پی)جیہے مسلح گروہاں دے خاتمے دیاں کوششاں کوں تکھا کرݨ تے زور ݙتے ۔ نیویارک اچ یو این ہیڈ کوارٹرز اچ اقوام متحدہ دے نائب ترجمان فرحان عزیز حق روزانہ دی بنیاد تے تھیوݨ آلی بریفنگ اچ پشاور حملے متعلق ھک سوال دے جواب اچ آکھیے پشاور دہشت گرد حملہ ساݙے کیتے مختلف پہلوواں توں تشویش دا باعث اے جنہاں اچوں ھک پہلو ٹی ٹی پی جیہے مسلح گروہاں توں خطے دے استحکام کوں پیش آندے خطرے دا اے ۔ پشاور حملے پچھوں مبینہ طورتے انہاں دا ہتھ اے تے اساں انہاں گروہاں دی شکست یقینی بݨاوݨ کیتے بھرپور کوششاں کرݨ چاہندوں ۔ نائب ترجمان آکھیے اقوام متحدہ ھک واری ول پوری دنیا اچ مقدس جاہواں دے تحفظ دا مطالبہ کیتے کیوں جو اے سوچݨا وی خوفناک اے جو عبادت گزاراں کوں ایں طرح حملے اچ نشانہ بݨایا ویندا پئے ۔اقوام متحدہ دے ترجمان اے ریمارکس اقوام متحدہ دی سلامتی کونسل دی طرفوں پریس بیان جاری کرݨ دے ھک ݙینھ بعد ݙتے جیں اچ پشاور خودکش حملے دی سخت ترین الفاظ اچ مذمت کیتی ڳئی اے تے بم دھماکے دے ذمہ واروں کوں انصاف دی کچاری اچ گھن آوݨ دا مطالبہ کیتا ڳئے ۔
