اسلام آباد۔1فروری(اے پی پی) پاکستان ۔ ازبکستان ٹرانزٹ ٹریڈ معاہدہ یکم فروری 2023کوں نافذ العمل کرݙتا ڳئے ،ݙوہیں ملکاں وچال طے پاتے ونڄݨ آلا اے معاہدہ ہمسایہ ملکاں تئیں تجارتی رسائی فراہم کریسی ۔وزارت تجارت دی دستاویزات دے مطابق پاکستان اتے ازبکستان دے درمیان ٹرانزٹ ٹریڈ معاہدہ تے دستخط کیتے ڳن جیں دے تحت پاکستان اتے ازبکستان دے درمیان پورٹس اتے بارڈر کراسنگ دی رسائی تے رضا مندی ظاہر کیتی ڳئی ۔ معاہدہ دے تحت پاکستان،ازبکستان کوں سی پورٹس جیں اچ گوادر،کراچی اتے بن قاسم شامل اے تحت رسائی فراہم کریسی جیں دے ذریعے او افغانستان،ایران اتے چین تئیں آپمی مصنوعات پڄا سڳسن ۔ ایں معاہدہ دے تحت ازبکستان ،پاکستان کوں آپݨے بارڈرز دے ذریعے زمینی رسائی فراہم کریسی ۔ایں سہولتاں دے تحت پاکستان کوں تجارتی مقاصد کیتے افغانستان،ترکمانستان، تاجکستان، قازقستان اتے کرغزستان تئیں رسائی حاصل ہوسی ۔
