اسلام آباد۔1فروری (اے پی پی) وفاقی وزیر انفارمیشن ٹیکنالوجی تے ٹیلی کمیونیکیشن سید امین الحق آکھیا جو ڈیجیٹل مردم شماری مارچ تئیں جاری رہسی جئیں دے بعد الیکشن کیشن کوں حلقہ بندیاں کیتے چار مہینے چہیدے ہوسن ایں کیتے عام انتخابات اکتوبر 2023 توں پہلے ممکن کائنی۔ سابق وزیراعظم عمران خان سیاسی جد وجہد آئین تے قانون دے دائرے اچ کرن ریڈ لائن کراس کریسن تاں نقصان ملک تے قوم دا تھیسی۔ کوئی کمپنی آوے یا ونڄے، صارفین اتے ملازمین دے حقوق تے سمجھوتہ کائنا تھیسی۔ اے ڳالھ انہاں بدھ کوں مقامی ہوٹل اچ نمبر ریسورس سوسائٹی ولوں انٹرنیٹ گورننس دی تقریب توں خطاب اتے میڈیا نال ڳالھ مہاڑ کریندیں ہوئیں آکھی۔ تقریب توں لاروس لمیٹڈ دے چیف ایگزیکٹیو لو ہینگ، میلون چینگ، کاشف نواز اتے محمد اسماعیل سودھے ٻے وی خطاب کیتا۔ ایں موقع تے ممبر ٹیلی کام محمد عمر ملک، ڈائریکٹر وائرلیس جہانزیب سودھے ٻے افسران اتے آئی ٹی انڈسٹری دی نشابر شخصیات وی موجود ہن۔ سید امین الحق آکھیا جو ہر ݙینھ دے نال سیاسی بے چینی ودھدی پی اے اتے ایہا سیاسی بے چینی ملک کوں معاشی بدحالی آلے پاسے ڳھن تے ویندے پی اے۔ ڈیجیٹل مردم شماری مارچ تئیں جاری رہسی جئیں دے بعد الیکشن کیشن کوں حلقہ بندیاں کیتے چار مہینے چہیدے ہوسن۔
