کراچی۔2فروری (اے پی پی) وزیراعظم محمد شہباز شریف آکھیا جو ڈیمز دی تعمیر اتے متبادل توانائی دے منصوبے پورے تھیوݨ نال آندے کجھ سالیں اچ ارباں ڈالر دی بچت تھیسی۔ سی پیک دا منصوبہ ماضی قریب اچ اپݨی پیدا تھئی مشکلاں پاروں رکیا، سی پیک منصوبے اتے چینی کمپنیاں نال سانجھے داری ودھیسوں جئیں نال ملک اچ ترقی اتے خوشحالی امسی۔ اے ڳالھیں انہاں خمیس کوں کے۔ تھری منصوبے دی افتتاحی تقریب توں خطاب کریندیں ہوئیں آکھی۔وزیراعظم آکھیا جو انہاں کیتے ایں منصوبے دا افتتاح کرݨ اعزاز دی ڳالھ اے، انہاں منصوبیاں نال ملک اچ توانائی دی لوڑھ پوری کرݨ اچ مدد ملسی۔ انہاں آکھیا جو پاکستان 27 بلین ڈالر دی پٹرولیم مصنوعات درآمد کریندے جیڑھی اساں کیتے ٻہوں اوکھ اے۔ ایں پلانٹ نال سستی توانائی ملسی جیڑھی پاکستان دی وݙی لوڑھ اے۔ وزیراعظم آکھیا جو اللہ تعالیٰ پاکستان کوں ایجھے وسائل ݙتن جو اساں ہائیڈل اتے ٻے ذرائع توں بجلی ٻݨا سڳدوں۔ وزیراعظم آکھیاجو دیامربھاشا اتے داسو ڈیم ٻݨدے پن۔ انہاں دے آپریشنل تھیوݨ اچ ٻے چار پنڄ سال لڳسن۔ پاکستان سجھ اتے ہوا نال سستی بجلی ٻݨا سڳدے۔ آوݨ آلے کجھ سالیں اچ متبادل توانائی دے منصوبیاں نال سستی بجلی ٻݨسی۔ انہاں آکھیا جو تھر اچ اللہ تعالیٰ اساکوں ٻہوں قدرتی وسائل ݙتن جیڑھے اساݙے آندے کئی سالیں دی لوڑھ پوری کر سڳدن۔ حکومت متبادل توانائی دے منصوبیاں تے کم اڳوں ودھیسی تانجو پٹرولیم مصنوعات دی مد اچ خر چ تھیوݨ آلے ارباں ڈالر بچائے ونڄ سڳدن۔ وزیراعظم آکھیا جو کے۔ تھری منصوبے کوں نواز شریف دور اچ چھیکڑی شکل ݙتی ڳی، اڄ اے 1100 میگاواٹ بجلی پیدا کریندا پے۔ ایں تے ٻے کم کرݨ دی لوڑھ اے ایں بارے چینی دوستاں نال ڳالھ مہاڑ تھیندی پی اے۔ انہاں آکھیا جو پاکستان اچ اڄوکے چھل پاروں وݙے پیمانے تے تباہی تھئی اتے 30 ارب ڈالر دا معاشی ضیان تھیے، ایں صورتحال اچ اساں چینی دوستاں توں توقع رکھیندو جو او فی یونٹ نرخ اچ ڳھٹکی کریسن۔ وزیراعظم پاکستان اٹامک انرجی کمیشن دے حکام ، سائنس داناں، انجینئرز اتے سٹاف کوں منصوبے تے ݙینھ رات محنت کرݨ تے شاباش ݙتی ۔ بعد اچ وزیراعظم کے ۔تھری آپریشنز روم دا دورہ کیتا جتھ انہاں کوں منصوبے بارے بریفنگ ݙتی ڳی۔
