اسلام آباد۔4فروری (اے پی پی) وزیراعظم دے مشیر امور کشمیر و گلگت بلتستان قمر زمان کائرہ آکھیے 05 فروری کوں یوم یکجہتی کشمیر مناوݨ دے حوالے نال تیاریاں مکمل کرڳھدن ۔ترجمان وزارت امور کشمیر و گلگت بلتستان دی طرفوں جاری بیان موجب ایں موقع تے اندرلے تے ٻاہرلے ملک پاکستانی آپݨے کشمیری بھراویں تے بھیݨاں دے نال بھرپور یک جہتی دا اظہار کریسن ۔ قمر زمان کائرہ آکھیے کشمیری شہدا کوں خراج عقیدت پیش کرݨ کیتے 5 فروری کوں پورے ملک اچ سویلے 10 وڄے ھک منٹ کیتے چپ کیتی ویسی ۔ انہاں مزید آکھیے شاہراہ دستور اسلام آباد تے کشمیری عوام نال یکجہتی کیتے ریلی وی کڈھی ویسی ۔ قمر زمان کائرہ آکھیے یوم یکجہتی کشمیر دے موقع تے وزیراعظم محمد شہباز شریف مظفرآباد ویسن تے آزاد کشمیر قانون ساز اسمبلی توں خطاب کریسن ۔ایں موقع تے صدر اتے وزیر اعظم پاکستان دی طرفوں یوم یکجہتی کشمیر دے حوالے نال خصوصی پیغامات وی نشر کیتے ویسن۔ قمر زمان کائرہ آکھیے 05 فروری دی مناسبت نال ٻاہرلے ملک قائم پاکستانی مشنز خصوصی ریلیز، سیمینارز تے تصویری نمائشاں دا انعقاد کریندے پئن ۔ پرنٹ والیکٹرونک میڈیا دے علاوہ سوشل میڈیا تے وی کشمیریاں نال بھرپور یکجہتی دا اظہار کیتا ویسی ۔
