دنیا عالمی جنگ دے دھانے تے پڄ ڳئی اے ، سیکرٹری جنرل اقوام متحدہ

اقوام متحدہ ۔7فروری (اے پی پی):اقوام متحدہ دے سیکرٹری جنرل انٹونیو گوٹیرس آکھیے جو دنیا عالمی جنگ دے دھانے تے پڄ ڳئی اے تے ایویں اݨ ڄاݨیے نی تھیندا پیا بلکہ عالمی برادری کھلی اکھیں توں تے تکھے ایں جنگ دے پاسے ودھدی پئی اے ۔ روسی خبررساں ادارے موجب اقوام متحدہ دی جنرل اسمبلی توں آپݨے خطاب اچ انہاں آکھیے دنیا ھک وسیع ترین جنگ دے پاسے ودھدی پئی اے تے امن دے امکانات گھٹ تے مزید کشیدگی اتے خونریزی دے امکانات ودھݨ ویندے پئن ۔ انہاں مزید آکھیے سیاسی فیصلے کرݨ آلیں اچ دور اندیشی اتے بصیرت دی کمی اتے تصب انہاں دی طرفوں درست فیصلے کرݨ دے رستے اچ رکاوٹ اے ۔ عارضی مفادات دے حصول دی سوچ نہ صرف غیر ذمہ دارانہ بلکہ غیر اخلاقی اے۔ سیاستدان اتے کاروباری لوکاں دی توجہ صرف اقتدار نال چبڑیے رہݨ تے کاروباری کاروباری مفادات تے پوری طرح مرکوز تھی چکی اے ۔ ݙوجھے پاسے اقوام متحدہ دے اصولاں تے مبنی نظام تے بین الاقوامی قانون کوں کنڈ پھچوں سٹ ݙتا ڳئے جیں دا نتیجہ دنیا دی موجودہ افسوس ناک صورتحال اچ ساݙے سامݨے ہے۔ جے ہر ملک اقوام متحدہ دے چارٹر دے مطابق اپݨی ذمہ واریاں پوری کرے تاں ایں ایں صورت اچ ہی امن نال زندگی گزارݨ دی ضمانت ݙتی ونڄ سڳدی اے ۔ ہݨ سارے عالمی رہنماواں کوں اکھیں کھولݨ تے رل تے کم کرݨ دی لوڑھ اے ۔