اسلام آباد۔15فروری (اے پی پی) کنوینئر ورلڈ مینارٹیز الائنس اتے سابق وفاقی وزیرجولیس سالک عالمی برادری تے زور ݙتے جو او انسانیت اتے امن دےتحفظ کیتے جنگ دے باوجود امن دی کوششاں جاری رکھے۔ بدھ کوں اپݨے بیان اچ جے سالک 1994 اچ جنگ توں متاثرہ بوسنیا دے اپݨے دورے دا ذکر کریندیں ہوئیں آکھیا جو میں بوسنیا ونڄ تے مسلماناں اتے عیسائیاں وچال مذہبی جڑت ودھاوݨ کیتے کوششاں کیتی کیونجو اوں ویلھے جنگ مسلماناں دا خون وہایا ہئی۔ جے سالک آکھیا جو ایں ویلھے دی وزیر اعظم شہید محترمہ بے نظیر بھٹو اپݨا دورہ منسوخ کرݨ دی درخواست کیتی کیونجو اوں ویلھے پاکستان دے اقوام متحدہ دے امن مندوب جمشید مارکر انہاں کوں ݙسیا جو خطے اچ وݙے پیمانے تے تنازعیاں پاروں حالات سازگار کائنی۔ میں وزیراعظم کوں آکھیا جو اگر اے میݙے بوسنیا ونجݨ دے رستے اچ رکاوٹ اے تاں میں اپݨی وزارت توں استعفیٰ ݙے سڳداں۔ انہاں آکھیا جو وزیراعظم کروشیا اچ پاکستان دے سفیر دی تصدیق دے بعد انہاں کوں این او سی ݙتا، کروشیا اچ سفیر اپݨی رضامندی ݙتی اتے وزیراعظم میکوں 20 دسمبر 1994 کوں بوسنیا ونجݨ دی موکل ݙتی۔ جے سالک ݙسیا جو کروشیا پجݨ دے بعد اساں کروشیا اچ سفیر نال چارٹرڈ یو این پلان اچ بوسنیا روانہ تھیے۔ انہاں ݙسیا جو ݙو پائلٹ، انہاں دی ذال اتے پتر ، سفیر اتے ہک تریمت صحافی بلٹ پروف جیکٹس اتے ہیلمٹ پاتے اوں چارٹرڈ طیارے اچ سوار تھیے۔ انہاں ݙسیا جو اساݙا طیارہ 17 ݙینھ بعد بوسنیا دے ہوائی اݙے تے لہݨ آلا پہلا طیارہ ہئی کیونجو اوں توں پہلے اقوام متحدہ دا ہک فوڈ طیارہ بمباری اچ تباہ تھی ڳیا ہئی۔ اساں اتھ پڄیے تاں ہر پاسے اندھارا ہئی اتے ہوائی اݙہ ریت دے تھلیاں نال ڈھکیا پیا ہئی۔ اوندے بعد وفد ہک ٹینگ تے سوار تھیا اتے بوسنیا دے شہر توں تھیندا ہک گرجا گھر پڄیا جتھ بشپ عبادت کریندے پے ہن۔ جئیں ویلھے انہاں کوں پتہ لڳیا جو پاکستان دے وفاقی وزیر انہاں نال یکجہتی کیتے پڄین تاں انہاں ساریاں دی اکھیں اچوں ہنجوں آڳے۔ انہاں ݙسیا جو اساں جنگ دے زخمی ٻالاں اتے لوکاں دی خیریت پچھݨ کیتے ہسپتال ڳے ہاسے۔ میں اپݨے رب دا شکریہ ادا کرینداں جو انہاں ݙوجھیاں دا سہارا ٻݨݨ دے ایں مقصد دی خدمت کرݨ دی میݙی کوششاں کیتے میکوں ٻہوں اتے عزت احترام نال نوازیا۔ کنوینئر ڈبلیو ایم اے آکھیا جو ہوائی جہازدستیاب کائنا ہئی آخر کار ہک مال بردار طیارہ آیا جئیں اچ کھاوݨ پیوݨ دی شہیں ہن۔ اساں سفیر سودھے اوں کارگو طیارے اچ واپسی دا سفر کیتا۔
