اسلام آباد۔22فروری(اے پی پی) وزیراعظم محمد شہباز شریف کفایت شعاری اقدامات دا اعلان کریندے آکھیے جو کابینہ ارکان رضاکارانہ طور تے تنخواہیں اتے مراعات نا ڳھنسن ڄݙاں جو کفایت شعاری نال سالانہ 200 ارب روپے بچسن، اڄوکی معاشی صورتحال پاروں آندے ݙو سال کوئی انتظامی یونٹ، ڈویژن، ضلع یا تحصیل نا ٻݨائی ویسی، جون 2024ء تئیں پرتعیش اشیا، سرکاری گاݙیاں ڳھنݨ تے پابندی ہوسی، بجلی دی بچت کیتے سرکاری دفاتر سویلے ساݙھے ست وڄے کھلسن، وݙے سرکاری گھر ویچݨ کیتے وزیر قانون دی اڳواݨی اچ کمیٹی ٻݨا ݙتی اے، توشہ خانہ توں 300 ڈالر تئیں دا تحفہ ملھ ڳھنݨ دی اجازت ہوسی۔ اے ڳالھ انہاں کابینہ اجلاس دے بعد وفاقی وزراء نال پریس کانفرنس اچ آکھی۔ انہاں آکھیا جو کابینہ ارکان، عوامی نمائندہ یا سرکاری افسر لگژریاں گاڑیاں ولا ݙیسن، ملک و بیرون ملک اکانومی اچ سفر کریسن تے اپݨے یوٹیلٹی بلز آپ ݙیسن اتے بیرونی دورے اچ فائیو سٹار ہوٹل نا ملسن، سرکاری ارکان کولو سکیورٹی گاݙیاں ولا ڳھدیاں ویسن، سرکاری دفتراں اچ ڳھٹ بجلی استعمال کرݨ آلے آلات لائےو یسن، وزارتی و ادارہ جاتی اخراجات اچ 15 فیصد کمی کیتی ویسی، سرکاری تقریبات اچ ون ڈش دی پابندی ہوسی، آندے بجٹ اچ اصلاحات اتے سرکاری اداراں دے اخراجات ڳھٹائے ویسن۔انہاں آکھیا جو پاک فوج غیر جنگی اخراجات اچ کمی کیتے مثبت ولدا ݙتے۔ انہاں آکھیا جو کفایت شعاری اقدامات دا نفاذ ایوان صدر، وزیراعظم ہائوس سودھا سارے اداریاں اتے دفتراں تے ہوسی۔وزیراعظم آکھیا جو کݨک اتے اٹے دی کوئی کمی کائنی، سرکاری ملازمین تے مہانڳ دا ٻیا ٻاھر نا پاتا ویسی اتے اشرافیہ کولو ٹیکس ڳھدا ویسی۔
