اسلام آباد۔3مارچ(اے پی پی) وزیراعظم محمد شہباز شریف نال قطر دے سفیر شیخ سعود بن عبدالرحمن بن فیصل الثانی جمعہ کوں اتھاں ملاقات کیتی ۔ وزیراعظم آفس دے پریس ونگ توں جاری بیان موجب ملاقات اچ قطر دے سفیر قطر اتے پاکستان وچال برادرانہ تعلقات کوں ودھاوݨ کیتے مختلف سرگرمیاں بارے ݙسایا ۔ وزیر اعظم محمد شہباز شریف ݙوہیں ملکاں وچال مشترکہ اقدارتے مبنی برادرانہ تعلقات دا اعادہ کیتا۔ انہاں تکڑے تعلقات کوں سانجھے طور تے فیدہ مند اقتصادی تعلقات اچ بدالݨ کیتے ݙوہیں پاسوں دے سانجھے عزم دا ذکر کیتا۔ وزیراعظم 2022 اچ تاریخی سیلاب دے نتیجے اچ پاکستانی عوام دی انسانی ہمدردی دی بنیاد تے امداد کرݨ تے قطر دا شکریہ ادا کیتا۔ قطری سفیر برادرانہ ݙوپاسے تعلقات کوں مزید ودھاوݨ تے وزیراعظم دا شکریہ ادا کیتا تے ایں سلسلے اچ قطر دی طرفوں تعاون دا یقین ݙیوایا ۔ واضح رہے جو قطر تقریباً 250,000 پاکستانیاں دی میزبانی کریندے جیڑھا جو ݙوہیں ملکاں دی ترقی اچ اہم کردار ادا کریندے پئن ۔ اڄوکے سال پاکستان تے قطر دے درمیان سفارتی تعلقات دے قیام دی 50 ویں سالگرہ اے۔ ݙوہیں ملک ایں سالگرہ کوں بہترین انداز اچ مناوݨ کیتے پرعزم ہن ۔
