اسلام آباد۔8مارچ(اے پی پی) وفاقی وزیر اطلاعات و نشریات مریم اورنگزیب آکھیے تریمتاں دا عالمی ݙینھ محض تریمتاں دے حقوق دے تحفظ دی تجدید عزم دا ہی نی بلکہ ھک گھر کوں گھراݨہ ، معاشرے کوں ما ، بھیݨ ، دھی تے ذال جیہے رشتیں نال مہذب سماج بݨاوݨ آلی تریمتاں دی قربانیاں ، خدمات اتے وفاواں دے اعتراف دا وی ݙینھ اے ۔ خواتین دے عالمی ݙینھ دے موقع تے آپݨے ٹویٹ اچ انہاں تریمتاں کوں سلام پیش کریندے ہوئیں آکھیے جو ہر گھر اچ ٻالڑیاں نال مساوی ورت ورتا نال ہی ترقی تھیسی ۔ تریمتاں دے عالمی ݙینھ تے انہاں والدین، اساتذہ کوں وی سلام جیڑھے آپݨیاں دھیریں تے پتراں اچ فرق نی کریندے تے انہاں دی زندگی اچ اڳوں ودھݨ اچ مدد کریندن ۔ وفاقی وزیر اطلاعات آکھیے ھک ٻالڑی دی تعلیم دا مطلب نسلاں دی ترقی اے، ھک صحت مند بااعتماد دھی توں ہی ھک صحت مند بااعتماد اتے باوقار قوم وجود اچ آندی اے ۔
