لاہور۔10مارچ (اے پی پی) وزیراعظم محمد شہباز شریف ترکیہ اتے شام دے زلزلہ متاثرین کیتے امدادی سامان جلدی ٻھیجݨ دی ہدایت کریندیں ہوئیں آکھیا جو 23 مارچ 2023 تئیں ترکیہ اچ ٹھڈ توں بچݨ کیتے پنڄاہ ہزار خیمے ٻھجوائے ویسن۔ خیمیاں دے معیار کوں چنڳا ٻݨاوݨ کیتے ترکیہ ٻھیجݨ توں پہلے رینڈم چیکنگ کرݨ دی وی ہدایت کیتی اے۔ جمعے کوں وزیراعظم آفس دے میڈیا ونگ توں جاری بیان موجب وزیراعظم شہباز شریف دی صدارت ترکیہ اتے شام اچ زلزلہ متاثرین کیتے خیمے اتے ٻیا امدادی شہیں جلدی ٻھیجݨ بارے جائزہ اجلاس تھیا۔ اجلاس اچ چیئرمین این ڈی ایم اے لیفٹیننٹ جنرل انعام حیدر ملک، وفاقی وزیر خزانہ ،وفاقی وزیر برائے پلاننگ اینڈ ڈویلپمنٹ اتے ترکیہ اچ پاکستان دے سفیر بریفنگ ݙتی۔ اجلاس کوں ݙسیا ڳیا جو ایں مہینے 23 مارچ تئیں ترکیہ اتے شام 34 پروازاں امدادی سامان ڳھن تے ویسن، انہاں اچ ٹھڈ وتں بچݨ کیتے پنجاہ ہزار خیمے، 38 ہزار کمبل ترکیہ اتے 22 ہزار کمبل اتے ݙاہ ہزار راشن دے پیکٹ شام ٻھیجے ویسن۔ اجلاس کوں ݙسیا ڳیا جو اڄ رات ݙو مال بردار طیارے 220 ٹن امدادی سامان ڳھن تے ترکیہ ویسن۔ کل چھݨ چھݨ ترکیہ اتے شام دے زلزلہ متاثرین کیتے پاکستان نیوی دا ݙوجھا جہاز سامان ڳھن تے روانہ تھیسی۔ اجلاس اچ وفاقی وزیر خزانہ اسحاق ڈار، وفاقی وزیر منصونہ بندی احسن اقبال، وزیراعظم دے معاون خصوصی سید طارق فاطمی،ترکیہ اچ پاکستان دے سفیر اتے ٻے اعلیٰ حکام شریک تھیے۔
