اسلام آباد۔13مارچ(اے پی پی):وزیرِاعظم محمد شہباز شریف کپاہ دے کاشتکاراں کیتے وݙا فیصلہ کریندے ہوئیں کپاہ دی اڄوکے سال قیمت 8500 روپے فی مݨ (40 کلو) مقرر کرݨ دی اصولی منظوری ݙے ݙتی اے جݙاں جو وزیراعظم ہدایت کیتی اے جو کپاہ دی سپورٹ پرائس وختی توں وختی اقتصادی رابطہ کمیٹی توں منظور کراوݨ کیتے پیش کیتی ویسی ۔ سنوار کوں وزیراعظم آفس دے میڈیا ونگ توں جاری بیان موجب وزیراعظم محمد شہباز شریف دی صدارت اچ زرعی ٹاسک فورس دا جائزہ اجلاس منعقد تھیا جیں اچ کپاہ دی پیداوار ودھاوݨ تے کپاہ دی سپورٹ پرائس مقرر کرݨ تے تفصیلی ڳالھ مہاڑ تھئی ۔ اجلاس اچ وفاقی وزرا اسحاق ڈار، سید نوید قمر، طارق بشیر چیمہ، نگران وزیر اعلی پنجاب سید محسن رضا نقوی، مشیرِ وزیرِ اعظم احد چیمہ اتے متعلقہ اعلی حکام شرکت کیتی۔ اجلاس کوں ݙسایا ڳیا جو گزریل سال سیلاب، مینھ تے نہری پاݨی دی قلت اتے کھاد دے بحران دی وجہ توں کپاہ دی پیداوار اچ خاطر خواہ گھٹکی تھئی اے ۔ اڄوکے سال کپاہ دی مجموعی پیداوار دا تخمینہ 12.77 ملین بیلز لاتا ڳئے ، جݙاں جو کپاہ دی سپورٹ پرائس اتے حکومت دے اقدامات پاروں نہ صرف کپاہ دی کاشت دے رقبے بلکہ فی ایکڑ پیداواراچ ودھارا متوقع ہے۔ اجلاس اچ کپاہ دی فی ایکڑ لاڳت اتے ایندا ݙوجھی فصلاں نال موازنہ پیش کیتا ڳئے ۔ ایں موقع تے وزیراعظم ہدایت کیتی جو صوبائی حکومتاں کساناں کوں کپاس دی مقرر کیتیاں ڳیاں قیمتاں دی فراہمی یقینی بݨاون ، وفاقی حکومت مقرر کیتی ڳئی سپورٹ پرائس تے عمل درآمد کیتے صوبائی حکومتاں دی ہرممکن مدد کریسی ۔
