اسلام آباد۔16مارچ(اے پی پی)صدر مملکت ڈاکٹر عارف علوی خصوصی افراد دی استعداد ودھاوݨ اتے کیریئر کونسلنگ تے زور ݙیندے آکھیے جو حکومتی اتے نجی شعبے کوں خصوصی افراد دی مالی و سماجی شمولیت کیتے کٹھے اقدامات کرݨے ہوسن۔ او خصوصی افراد دی بہبود اچ مالیاتی خدمات دے کردار بارے بریفنگ اجلاس دی صدارت کریندے پئے ہن۔ نیشنل رورل سپورٹ پروگرام دے چیف ایگزیکٹو آفیسر ڈاکٹر راشد باجوہ، این او ڈبلیو پی ڈی پی دے چیف ایگزیکٹو آفیسر عمیر احمد، نیوٹیک دے ایگزیکٹو ڈائریکٹر ڈاکٹر خالد محمود، سٹیٹ بینک آف پاکستان دے اسلامک فنانس ڈیپارٹمنٹ دے ڈائریکٹر غلام محمد، ایڈیشنل فنانس سیکرٹری عامر محمود حسین، ڈبلیو ایچ او دی ٹیکنیکل ایڈوائزر ڈاکٹر مریم ملک اتے سینئر سرکاری افسران اجلاس اچ شرکت کیتی۔ صدر مملکت آکھیا جو خصوصی افراد کوں انہاں دی ہنر اتے صلاحیتاں دے مطابق ملازمتاں دے مواقع ݙیوݨے ہوسن، خصوصی افراد دیاں مختلف جسمانی و مالی رکاوٹاں کوں ݙیہدے ہوئے انہاں کوں مالیاتی خدمات تئیں رسائی اتے روزگار کیتے خود مختار ٻݨاوݨا ہوسی۔ اجلاس اچ نیشنل رورل سپورٹ پروگرام دے چیف ایگزیکٹو آفیسر ڈاکٹر راشد باجوہ خصوصی افراد اتے تریمتیں کوں بااختیار ٻݨاوݨ کیتے اقدامات تے بریفنگ ݙتی۔
