اسلام آباد۔20مارچ(اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے عمران خان نیازی ہمیشہ قومی ترقی کوں متاثر کرݨ تے ذاتی مفادات کیتے ملک اچ تھیوݨ آلی ترقیاتی سرگرمیاں کوں سبوتاژ کرݨ دی کوشش کیتی ، نواز شریف نال روزانہ دی بنیاد تے حاضری لوائی ویندی ہئی تے ہݨ ھک بندہ سرکاری املاک کوں نشانہ بݨیندا پئے لیکن ایں کوں ضمانتاں وی ملدیاں پئن ،پاکستان دی عدلیہ توں وی سوال اے جو ݙو مختلف رویے کیوں ہن ؟ ۔اے ڳالھ انہاں سنوار کوں پریس کانفرنس توں خطاب کریندے ہوئیں آکھی اے ۔ انہاں آکھیے عمران خان دے 4 سالاں ملکی معیشت تباہ کیتی۔ 2002 دے بعد توں ایں بندے دا کوئی تعمیراتی کم کرݨ دا ٹریک ریکارڈ کائنی ، ہر واری ناراض تھی تے پارلیمنٹ توں ٻہر چلیے ویندے ہن تے ہݨ اوں ہیٹ ٹرک کیتی ، انہاں 2002، 2013 اتے 2018 اچ استعفیٰ ݙتا، ایں توں انڄ ݙو صوبائی اسمبلیاں کوں مکمل طور تے نظام کوں تباہ کرݨ دے مقصد نال تحلیل کیتا۔ انہاں آکھیے استعفیں تے اسمبلیاں تحلیل کرݨ ، نظام کوں ڈھاوݨ دا مقصد پورا نی کیتا ، عمران خان کنے صرف ھک آپشن رہ ڳے جو او انتشار تے لاقانونیت پیدا کرݨ کیتے فسادات کراون۔ہݨ جݙاں عمران خان حکومت دی ناکام معاشی پالیسیاں توں ٻاہروں آوݨ دی کوشش کریندا پئے جیں دی توجہ توں مالیاتی غیر یقینی صورتحال پیدا تھئی ، دنیا نال اقتصادی رابطے بحال تھیندے پئن آئی ایم ایف نال معاہدہ تھیندا پئے او (عمران) ھک واری ول قومی ترقی اتے معاشی ترقی کوں سبوتاژ کرݨ دی کوشش کریندا پئے ۔
