مظفرگڑھ۔ 21 مارچ(اے پی پی) وزیر مملکت بین الصوبائی رابطہ مہر ارشاد احمد خان سیال چوک سرور شہید اچ بے نظیر انکم سپورٹ پروگرام دے تحت بے نظیر ڈائنامک رجسٹری سینٹر دا افتتاح کرݙتے ۔ وزیر مملکت ایں موقع تے تقریب توں خطاب کریندے ہوئیں آکھیے جو ضلع مظفرگڑھ اچ 11 ڈائنامک رجسٹری سینٹر بݨائے ویندے پئن ایں سلسلے اچ اڄوکے مہینے وفاقی وزیر تے چیئرپرسن بےنظیر انکم سپورٹ پروگرام خانگڑھ اچ وی افتتاح کیتا ہئی۔ انہاں آکھیے ایں ویلھے بے نظیر انکم سپورٹ پروگرام دے تحت ضلع مظفرگڑھ دے 3 لکھ 21 ہزار توں ودھ خانداناں کوں وظائف ݙتے ویندے پئن۔ وزیر مملکت مہر ارشاد احمد خان سیال مزید آکھیے حکومت بے نظیر کفالت دی اڳلی قسط کیتے 80ارب توں ودھ دی رقم رکھی اے تے سالانہ بجٹ 252 ارب روپے اے۔ انہاں آکھیے جو اساں وفاقی وزیر تے چیئرپرسن شازیہ مری توں درخواست کیتی ہئی جو چوک سرور شہید اچ بے نظیر انکم سپورٹ پروگرام دا دفتر بݨایا ونڄے کیوں جو اتھاں دے لوکاں کوں ݙوجھے شہراں اچ ونڄݨا پوندے تے عوام کوں تکلیف تھیندی اے ، چیئرپرسن شازیہ مری چوک سرور شہید اچ دفتر بݨاوݨ دا حکم ݙتا ۔
