الیکشن کمیشن دا فیصلہ پاکستان دے فائدے اچ اے، الیکشن کمیشن معاشی، سیاسی اتے سکیورٹی دی صورتحال ݙیکھ تے فیصلے کیتے، وفاقی وزیر اطلاعات تے نشریات مریم اورنگزیب

اسلام آباد۔23مارچ (اے پی پی) وفاقی وزیر اطلاعات تے نشریات مریم اورنگزیب آکھیا جو الیکشن کمیشن دا فیصلہ پاکستان دے فائدے اچ اے، الیکشن کمیشن معاشی، سیاسی اتے سکیورٹی دی صورتحال ݙیکھ تے فیصلے کیتے۔ آئین دے آرٹیکل 218 دے تحت الیکشن کمیشن کوں یقینی ٻݨاوݨ اے جو شفاف، غیرجانبدارانہ اتے منصفانہ انتخابات تھیون، آرٹیکل 224 دا تقاضا اے جو انتخابات ویلھے وفاق اتے صوبائی اکائنیاں اچ نگران حکومتاں ہوون۔ خمیس کوں اپݨے بیان اچ انہاں آکھیا جو الیکشن کمیشن سارے سٹیک ہولڈرز نال مشورے دے بعد اے فیصلہ کیتے۔ الیکشن کیشن دے فیصلے نال ملک اچ سیاسی استحکام دی ضمانت ملسی۔ تحفظات ہن جو ہک بندے دی انا پاروں ݙو صوبیاں تے زبردستی الیکشن مسلط کیتا ویندا پے۔ انہاں آکھیا جو قومی اسمبلی دا الیکشن تھیسی تاں ݙو صوبیاں اچ حکومتاں ٻݨسن۔ 30 اپریل کوں ݙو صوبیاں اچ الیکشن تھیندے تاں الیکشن ہمیشہ کیتے متنازعہ تھی ویندے۔ 30 اپریل کوں الیکشن تھیندے تاں پنجاب اتے خیبرپختونخواہ اچ چھی مہینے توں پہلے اسمبلیاں ختم تھی ویندی۔ وفاقی وزیر مریم اورنگزیب آکھیا جو الیکشن کمیشن اپݨے فیصلے نال ملک کوں وݙے آئینی بحران توں بچا ڳھدے۔ ہک بندے دی مرضی تے آئین نی چل سڳدا، جئیں ویلھے چاہوے آئین تروڑ ݙیوے، جئیں ویلھے چاہوے اسمبلی تروڑ ݙیوے۔ اے کائنا چلسی۔