ملک کوں ٻہوں وݙا معاشی چیلنج درپیش اے، ایں صورتحال اچ ݙاہ کروڑ لوکاں کوں مفت اٹا ݙیوݨ ٻہوں وݙا کم اے، وزیراعظم شہباز شریف

اسلام آباد۔27مارچ (اے پی پی) وزیراعظم محمد شہباز شریف آکھیا جو ملک کوں ٻہوں وݙا معاشی چیلنج درپیش اے، ایں صورتحال اچ ݙاہ کروڑ لوکاں کوں مفت اٹا ݙیوݨ ٻہوں وݙا کم اے۔ سیاسی قیادت، سارے ادارے اتے مختلف زندگی دے شعبیاں توں تعلق رکھݨ آلے لوک ملک دا ونجیا ہوئیا مقام واپسی ݙواوݨ کیتے ݙینھ رات ہک کرݨا پوسی۔ جیڑھے ٹٻر بی آئی ایس پی اچ رجسٹرڈ کائنی انہاں کوں وی اٹے دے ترائے تھیلے مفت ݙتے ویسن۔ اے ڳالھیں انہاں سنوار کوں راولپنڈی اچ مفت اٹا ݙیوݨ دے مرکز دے معائنے اچ ڳالھ مہاڑ کریندیں ہوئیں آکھی۔ ایں موقع تے وفاقی وزیر اطلاعات تے نشریات مریم اورنگزیب، پنجاب دے نگران وزیر صحت ڈاکٹر جمال ناصر، وزیراعظم دے معاون خصوصی احد چیمہ، مسلم لیگ( ن ) دے رہنما ملک ابرار احمد، کمشنر راولپنڈی اتے ٻے اعلیٰ حکام وی موجود ہن۔ وزیراعظم اٹے ڳھنݨ آوݨ آلے شہریاں توں انہاں دے مسئلے پچھیے اتے مفٹ اٹے ڳھنݨ اچ آوݨ آلی اوکھ دا جائزہ ڳھدا۔ وزیراعظم کوں کمشنر راولپنڈی مفت اٹا ݙیوݨ دے انتظامات بارے بریفنگ ݙتی۔ وزیراعظم انتظامات کوں ٻیا بہتر ٻݨاوݨ دی ہدایت کریندیں ہوئیں آکھیا جو پنجاب دے علاوہ ٻے صوبے، آزادکشمیر،گلگت بلتستان دی عوام جیڑھی راولپنڈی اچ رہندن ، انہاں کوں وی مفت اٹا ݙتا ونڄے۔ وزیراعظم ہدایت کیتی جو اڄ منگل توں مفت اٹا مرکز تے ترائے تھیلے ہکے ویلھے ݙتے ویسن تانجو ولا ولا آوݨ دی زحمت نہ تھیوے۔ جیڑھے لوک ہک تھیلا ڳھن ڳن انہاں کوں اگلی واری ݙو تھیلے ݙتے ویسن۔